Friday, June 05, 2020

Hell or High Water (2016) - ‘செய் அல்லது செத்துமடி'







குற்றங்களை கறாராக விசாரித்து தீர்ப்பும் தண்டனையும் சொல்வது வேறு, குற்றங்களுக்கான ஆணி வேர் காரணங்களை கண்டறிவது வேறு. ஒரு குறிப்பிட்ட இடத்தின் சமூகவியல் பின்னணி கூட குற்றங்களுக்கு காரணமாக அமையலாம். சகோதர்களாக இருக்கும் இரு சில்லறைத் திருடர்களின் மூலமாக இத்திரைப்படம் அதைத்தான் சொல்கிறது.

**

இடம் மேற்கு டெக்சாஸ். அண்ணன் டேனர், தம்பி டோபி. 'சூது கவ்வும்' திரைப்படத்தில் விஜய் சேதுபதி  ஐந்து கட்டாயமான விதிகளை வைத்துக் கொண்டு பாதுகாப்பு காரணமாக குறைந்த அளவு பணத்தைக் கொள்ளையடிப்பார் அல்லவா? அது போலவே இவர்களும் சில்லறை நோட்டுக்களை மட்டும் திருடுபவர்கள். இவர்களுக்கும் சில பாலிசிகள் உண்டு.  வங்கிகளில் மட்டுமே கொள்ளையடிப்பார்கள்.  முதல் ஊழியர் வரும் காலை நேரத்தில் முகத்தை மறைத்துக் கொண்டு உள்ளே நுழைந்து துப்பாக்கி முனையில் மிரட்டி சிறிய மதிப்புள்ள பணத்தைக் கொள்ளையடிப்பார்கள். பெரிய நோட்டுக்களைத் தொட்டால் பிரச்சினை ஏற்படும் என தெரியும். கொள்ளையடிக்கப் பயன்படுத்தும் கார்களை மண்ணில் புதைத்து விடுவார்கள். இவர்களின் மீது தொடர்ச்சியாக புகார்கள் வந்தாலும் எந்த தடயமும் கிடைக்காததால் காவல்துறை திணறுகிறது.

**

இவர்களின் கொள்ளைகளுக்கு பின்னால் ஒரு புனிதமான நோக்கம் உண்டு. அவர்களின் தாய்க்குச் சொந்தமான பண்ணையொன்று கடனில் மூழ்கியிருக்கிறது. அதை மீட்க வேண்டும். அண்ணன் ஏற்கெனவே சில திருட்டுக்களில் சிறை சென்றவன் என்பதால்  அவனுக்கு குடும்பம் என்று ஏதுமில்லை. ஆனால் தம்பிக்கு பணத் தேவை இருக்கிறது. விவாகரத்து ஆனவன் என்றாலும் தங்களின் மகன்கள் வருங்காலத்தில் கஷ்டப்படாமல் இருக்க வேண்டும் என நினைக்கிறான். குறிப்பாக தன்னைப் போல் ஆகி விடக்கூடாது என்பதில் உறுதியாக இருக்கிறான். அதற்காக அடமானத்தில் இருக்கும் பண்ணை நிலத்தை எப்படியேனும் மீட்டாக வேண்டும். மேலும் சில வங்கிகளில் கொள்ளையடிக்கிறார்கள். திருடிய பணத்தையெல்லாம் சாமர்த்தியமாக வெள்ளையாக்குகிறார்கள்.

மார்கஸ் சில நாட்களில் ரிடையர்ட் ஆகப் போகும் போலீஸ்காரர். அவருடைய உதவியாளர் ஆல்பர்ட்டோ. இருவரும் இணைந்து இந்த சில்லறைத் திருடர்களை பிடிக்க வியூகம் வகுக்கிறார்கள். மார்கஸ் அனுபவஸ்தர் என்பதால் அவர்கள் திருடும் முறையை அலசுகிறார். 'இந்தந்த இடத்தில்தான் அடுத்து வருவார்கள்' என்று யூகித்து சொல்கிறார். உதவியாளருக்கு இது பிடிபடவில்லையென்றாலும் அவருடன் வேண்டாவெறுப்பாக செல்கிறார்.


**

அண்ணனும் தம்பியும் வழக்கம் போல் ஒரு வங்கிக்கு காலை நேரத்தில் வேட்டைக்கு செல்கிறார்கள். ஆனால் அங்கு நிறைய வாடிக்கையாளர்கள் இருக்கிறார்கள். என்றாலும் சுதாரித்துக் கொண்டு அனைவரையும் மிரட்டி விட்டு கொள்ளையடிக்கத் துவங்குகிறார்கள். வங்கியின் காவலாளியும் வாடிக்கையாளர் ஒருவரும் தங்களிடம் துப்பாக்கியில் இவர்களை சுட முயல பதிலுக்கு  சுட்டு அவர்களை சாகடிக்கிறார்கள். தப்பி வெளியே வந்தால் அங்கும் பொதுமக்களில் சிலர் துப்பாக்கியுடன் நிற்கிறார்கள். எப்படியோ அவர்களிடமும் தப்பி வரும் போது தம்பிக்கு  குண்டு பாய்ந்து விடுகிறது.  பின்னாலேயே  காவல்துறையின் வாகனங்கள்.

தம்பியிடம் பணத்தை தந்து விட்டு அண்ணன் வேறொரு வாகனத்தில் செல்கிறான். காவல்துறையிடமிருந்து சாமர்த்தியமாக தப்பி ஒரு குனறின் மீது ஏதேறி அங்கிருந்து போலீஸ்காரர்களை துப்பாக்கியால் சுடுகிறான். இரு தரப்பிலும் சண்டை நடக்கிறது. இந்த தகவல் மார்கஸூக்குப் போகிறது. 'நான் சொன்னேன் பாத்தியா, வா, போகலாம்' என்று ஆல்பிரெட்டை கூட்டிக் கொண்டு கிளம்புகிறார். அங்கு நடக்கும் துப்பாக்கிச் சண்டையில் ஆல்பிரெட்டின் தலையில் குண்டு பாய்ந்து உடனே இறந்து போக மார்கஸூக்கு பயங்கர கோபம் வருகிறது.

உள்ளூர்க்காரர் உதவியுடன் குன்றின் இன்னொரு பக்கமாகச் சென்று அண்ணன் திருடனை சுட்டு வீழ்த்துகிறார். தன்னுடைய அண்ணன் கொல்லப்பட்டது குறித்து அறிந்து தம்பி வருத்தப்படுகிறான். ஒருவகையில் அந்தச் சாவு எதிர்பார்த்துதான். பணம் தம்பிக்குச் செல்லட்டும் என தன் உயிரையே தந்திருக்கிறான் அண்ணன். கொள்ளையடித்த பணத்தை வைத்து கடனில் இருந்த பண்ணையை தம்பி மீட்கிறான். அந்த நிலத்தில் எண்ணைய் வளம் இருப்பதால் அவனுக்குப் பிறகு அவனுடைய வாரிசுகளுக்கு நிலையான வருமானம் வரும் நிம்மதி ஏற்படுகிறது. அவனுடைய கணக்கு வழக்குகள் சுத்தமாக இருப்பதால் காவல்துறையால் அவனை  எதுவும் செய்ய முடிவதில்லை.

**

ரிடையர்ட் ஆகும் மார்க்ஸ், தம்பி திருடனை தேடிப் போகிறார். தன்னுடைய கூட்டாளி இறந்து போனதை அவர் அத்தனை  எளிதில் மறக்கத் தயாராக இல்லை. அவன் துப்பாக்கியுடன் நிற்கிறான். "உன் கூட  கொஞ்சம் பேசத்தான் வந்திருக்கேன். உட்காரலாமா?" இருவரும் உரையாடுகிறார்கள். "ஏன் செஞ்சீங்க?"

டோபி தன்னுடைய குடும்பத்தின் வறுமையான பின்னணி பற்றி சொல்கிறான். அவர்களின் தாய் சமீபத்தில் இறந்து போனதைப் பற்றியும் அண்ணன் திருடனாக இருந்தது பற்றியும் தன் மகன்களுக்காக இந்த நிலத்தை மீ்ட்க பணம் சேர்த்தது பற்றியும் என எல்லாவற்றையும் சொல்கிறான். அவனுடைய மனைவியும் மகன்களும் வருகிறார்கள். அவர்களின் முன்னால் உரையாட விரும்பாத மார்கஸ் கிளம்புகிறார். 'இந்த உரையாடலை வேறொரு சமயத்தில் முடித்துக் கொள்ளலாம்' என்கிறான் டோபி.


**

காலனி ஆதிக்கத்தின் மூலம் தங்களின் வாழ்வாதாரங்களை இழந்த பழங்குடிகளின் இளைய தலைமுறை தங்களின் பாரம்பரிய வறுமையிலிருந்து மெல்ல மீள்வதற்காக எதையும் செய்யத் தயாராக இருக்கும் துயரத்தின் வரலாற்றைப் பற்றி இத்திரைப்படம் பேசுகிறது. வயதான போலீஸ்காரர் மார்கஸாக நடித்திருக்கும் Jeff Bridges-ன் நடிப்பு அருமை. இவரும் உதவியாளரும் பேசிக் கொள்ளும் வசனங்கள் சுவாரசியமானது. டோபியாக Chris Pine கலக்கியிருக்கிறார். டெக்ஸாஸின் அபாரமான பாரம்பரிய இசை படமெங்கும் ஒலிக்கிறது. பல விருதுகளைப் பெற்றிருக்கும் இத்திரைப்படத்தை திறமையாக இயக்கியிருப்பவர் David Mackenzie.


(குமுதம் சினிமா தொடரில் பிரசுரமானது)

suresh kannan

Thursday, June 04, 2020

The Book Thief (2013) - ‘நூல்களின் காதலி'





கலை, இலக்கியம் போன்ற உன்னதமான விஷயங்கள் மக்களின் துன்பமான சமயங்களில்  எத்தனை அருமையான மருந்தாகப் பயன்படுகின்றன என்பதை நெகிழ்வாகவும் அழுத்தமாகவும் பதிவு செய்திருக்கும் திரைப்படம் இது. யூதர்களுக்கு நாஜிக்களுக்கு  இழைத்த வரலாற்றுக் கொடுமைகளின் பின்னணியில் ஓர் அழகான மெல்லிய கோடு  போல இத்திரைப்படம் உருவாக்கப்பட்டிருக்கிறது.

***


வருடம் 1938. சிறுமி லீஸல் தன் தாயை விட்டுப் பிரிந்து தன் வளர்ப்பு பெற்றோாரிடம் சென்று சேர்வதற்காக பயணித்துக் கொண்டிருக்கிறாள். வழியில் அவளது தம்பி இறந்து போகிறான். புதைக்கும் இடத்தில் கல்லறை ஊழியர் விட்டுச் செல்லும் புத்தகம் ஒன்றை தன்னோடு லீஸல் எடுத்துச் செல்கிறாள். ஆனால் அவளுக்கு வாசிக்கத் தெரியாது.

புதிய இடத்தில் வளர்ப்பு தாய் கடுகடுவென நடந்து கொள்கிறாள். ஆனால் தந்தையான ஹான்ஸ் பிரியமுடன் லீஸலை கவனித்துக் கொள்கிறார். அவளுக்கு எழுதத் தெரியாததைக் கண்டு பள்ளியில் பிள்ளைகள் சிரிக்கின்றனர். லீஸல் வைத்திருக்கும் புத்தகத்தின் மூலம் புதிய தந்தை வாசிப்பை கற்றுத் தருகிறார். பக்கத்து வீட்டில் வசிக்கும் ரூடி என்கிற துறுதுறு சிறுவன் லீஸலுக்கு நண்பனாகிறான். "உங்க அம்மா கம்னியூஸ்டாமே, நெஜம்மாவா?"

தன்னிடமிருக்கும் புத்தகத்தின் மூலம் வாசிக்கவும் எழுதவும் லீஸல் கற்றுக் கொள்கிறாள். அவளுக்கு புத்தகங்களின் மீதான விருப்பம் பெருகுகிறது. தங்களின் அரசியல் கொள்கைகளுக்கு விரோதமான நூல்களை நாஜிக்கள் தீயில் இட்டு எரிக்கிறார்கள். லீஸலையும் அவ்வாறாக  புத்தகத்தை எரிக்கச் சொல்லி கட்டாயப்படுத்துகிறான் ஒரு சிறுவன். வேறு வழியில்லாமல் அதைச் செய்கிறாள். அனைவரும் சென்றதும் தீயிலிருந்து எரியாமல் தப்பித்த ஒரு புத்தகத்தை எடுத்து வருகிறாள். அந்த ஊர் மேயரின் மனைவி இதைப் பார்த்து விடுகிறாள்.

***

லீஸல் தங்கியிருக்கும் வீட்டில் மேக்ஸ் என்கிற இளைஞன் விருந்தாளியாக வருகிறான்.  யூத இனத்தைச் சேர்ந்தவன் என்பதால் நாஜிக்களிடமிருந்து தப்பிக்க அடைக்கலம் தேடி வந்திருக்கிறான். இளைஞனின் தந்தை ஒரு காலத்தில் லீஸலின் தந்தைக்கு உதவியிருக்கிறார். இப்போது பதில் உதவி செய்ய வேண்டிய நிலைமை. ஆனால் இந்த விஷயம் வெளியே தெரிந்தால் நாஜிக்கள் லீஸலின் குடும்பத்தையே காலி செய்து விடுவார்கள். 'எவரிடமும் இந்த விஷயத்தைப் பற்றி மூச்சு விடக்கூடாது' என்று லீஸலிடம் சொல்கிறார்கள்.

புதிய விருந்தாளியான மேக்ஸூம் லீஸலும் நட்பாகிறார்கள். இருவருமே ஒருவகையில் நாஜிக்களால் பாதிப்புக்குள்ளானவர்கள் என்பதால் அவர்களின்  நட்பு இறுகுகிறது. துவைத்த துணிகளை தருவதற்காக மேயரின் வீட்டிற்கு செல்கிறாள் லீஸல். மேயரின் மனைவியைப் பார்த்து திகைக்கிறாள். ஆனால் அவரோ லீஸலை தன்னுடைய நூலகத்திற்கு அன்புடன் அழைத்துச் செல்கிறார். "நீ விரும்பும் போதெல்லாம் இங்கு வந்து படிக்கலாம்"

மேக்ஸ் லீஸலுக்கு பல விஷயங்களைச்  சொல்லித் தருகிறான். அவன் தலைமறைவாக இருப்பதால் வெளியுலகம் எப்படியிருக்கிறது என்பதை பதிலுக்கு லீஸல் சொல்கிறாள். மேக்ஸ்ஸின் உடல்நலம் கடுமையாக பாதிக்கப்படுகிறது. அவன் நோயில் வீழ்ந்திருக்கும் சமயத்தில் தான் எடுத்து வரும் புத்தகங்களையெல்லாம் வாசித்துக் காண்பிக்கிறாள் லீஸல். அதிர்ஷ்டவசமாக மேக்ஸ்  பிழைத்துக் கொள்கிறான். "நான் வாசித்ததையெல்லாம் நீீ கேட்டாயா?" என்கிறாள் லீஸல். "ஆமாம். அதனால்தான் நான் உயிர் பிழைத்தேன்"

***

புத்தகங்களை வாசிக்கும் போது மேயரால் கண்டுபிடிக்கப்பட்டு துரத்தப்படுகிறாள் லீஸல். என்றாலும் எவருக்கும் தெரியாமல் மேயரின் வீட்டின் பின்புறமாக நுழைந்து புத்தகங்களை எடுத்து வந்து வாசிக்கிறாள். யூதர்கள் எவராவது பதுங்கியிருக்கிறார்களா என நாஜிக்கள் ஒவ்வொரு வீடாக சோதனையிடுகிறார்கள். சாமர்த்தியமாக மேக்ஸை தப்பிக்க வைக்கிறாள் லீஸல். 'தான் இனியும் இங்கிருந்தால் எல்லோருக்கும் பிரச்சினை' என்றபடி மேக்ஸ் அங்கிருந்து சென்று விடுகிறான். லீஸல் உட்பட அவளுடைய குடும்பமே கண் கலங்குகிறது.

இரண்டாம் உலகப் போர் துவங்குகிறது. போர் விமானங்கள் மூலமாக குண்டு மழை பொழிகிறது. மக்கள் பதுங்கு குழியில் அச்சத்துடன் உட்கார்ந்திருக்கின்றனர். லீஸலின் தந்தை ஹார்மோனியத்தின் மூலம் அழகான இசையை வாசிக்கிறார். அவர்களுக்கு சற்று ஆசுவாசம் ஏற்படுகிறது. ராணுவத்தில் பணிபுரிவதற்காக அவரை அழைத்துச் சென்று விடுகிறார்கள். மீண்டும் அதே போல பதுங்கு குழியில் இருக்க நேரும் போது தானே உருவாக்கிய ஒரு கதையை லீஸல் அனைவருக்கும் சொல்கிறாள். போர்ச்சூழலின் பயத்தை தற்காலிகமாக மறந்து மக்கள் கதையைக் கேட்கிறார்கள்.


போர்த் தாக்குதல் தீவிரமடைகிறது. குண்டு விழுந்து பல வீடுகள்  சேதமாகின்றன. பல உயிர்கள் பலியாகின்றன. லீஸலின் வளர்ப்பு தாயும் தந்தையும் கூட இறந்து போகிறார்கள். பக்கத்து வீட்டு சிறுவன் ரூடியும் இறக்கிறான். லீஸல் உயிர்தப்புகிறாள். மேயரின் மனைவி அவளைக் கண்டுபிடித்து அழைத்துச் செல்கிறாள்.

பல வருடங்கள் கழித்து லீஸல் ஓர் அற்புதமான எழுத்தாளராகியிருக்கும் தகவலோடு படம் நிறைகிறது.


***

சிறுமி லீஸலாக அற்புதமாக நடித்திருக்கும் Sophie Nélisse -ன் பார்வையில் பெரும்பாலான காட்சிகள் நகர்கின்றன. வன்முறையை நேரடியாக காட்டாமல் நாஜிக்களின் கொடுமையை அழுத்தமாக பதிவு செய்திருப்பது திரைக்கதையின் சிறப்பு. ஜான் வில்லியம்ஸின் பின்னணி மென்மையான பின்னணி இசை படத்திற்கு அழகைக் கூட்டியிருக்கிறது. பல விருதுகள் பெற்ற இத்திரைப்படத்தை இயக்கியிருப்பவர் Brian Percival.


(குமுதம் சினிமா தொடரில் பிரசுரமானது)

suresh kannan

Wednesday, June 03, 2020

The Girl on the Train (2016) - ‘மூன்று துரோகம் - ஒரு கொலை






இதுவொரு சைக்காலஜிக்கல் திரில்லர்.  மூன்று பெண்களின் வாழ்வை அவர்களுக்கே தெரியாமல் ஒருவன் சீரழிக்கிறான். இதற்கான பழி முழுவதும் அப்பாவிப் பெண்ணின் மீது விழுகிறது. சுவாரசியமான திரைக்கதையின் மூலமாக காட்சிகள் விரிவது இத்திரைப்படத்தின் பலம்.

***


ராச்சல் விவாகரத்து ஆனவள்.  மனக்குழப்பங்களும் குடிப்பழக்கமும் உள்ளதால் அனைவராலும் விநோதமாக பார்க்கப்படுகிறாள். தனது தோழியின் வீட்டில் தங்கியிருந்த படி  தினம்  ரயிலில் பயணிக்கிறாள். பழைய வீட்டை ரயில் கடந்து செல்லும் சிறிய தருணத்தில் முன்னாள் கணவனின் குடும்பத்தை, அவனுடைய புதிய மனைவி அன்னாவை குறிப்பாக அவர்களின் குழந்தையை ஏக்கத்துடன் பார்த்தபடி செல்வாள்.


தன் குழந்தையை தூக்கிச் சென்று விடுவாள் என்று ராச்சல் மீது அன்னாவிற்கு  பயமும் சந்தேகமும் உண்டு. தன் கணவனுக்கு  ராச்சல் போனில் மெசேஜ் அனுப்புவது, போன் செய்வது ஆகியவையும் பிடிப்பதில்லை.


ராச்சல் ரயிலில் இருந்து  வெளியே வேடிக்கை பார்க்கும் சமயத்தில் ஓர் அந்நிய இளம் பெண்ணை தினமும் பார்ப்பாள். அவள் தன் கணவனுடன் அன்பாக பழகும் விதத்தை தினமும் பார்க்கும்  ராச்சலுக்கு ஏக்கம் உண்டாகும்.  'அன்பான வாழ்வு அமைந்திருக்கிற  குடும்பத்தலைவி' என்று அந்த முகம் தெரியாத பெண்ணின் மீது பிரியம் உண்டாகும்.

உண்மையில் ராச்சல் காண்பது கானல் நீர் காட்சிதான். அவளால் வேடிக்கை பார்க்கப்படும் 'மேகன்' என்கிற  இளம்பெண் தன்னுடைய இயந்திரத்தனமான கணவனுடன் வெறுமையான வாழ்வை வாழ்கிறவள். ராச்சலின் பழைய வீட்டில் 'தாதி' வேலை பார்ப்பவள். அவளும் தன் வாழ்க்கை குறித்த மனக்குழப்பங்களைக் கொண்டவள்.




***

ஒரு நாள் - ராச்சல் வழக்கம் போல இளம் பெண்ணின் வீட்டை கவனிக்கும் போது ஒரு காட்சியைக் கண்டு அதிர்ச்சியடைகிறாள். அவளை ஆரத் தழுவிக் கொண்டிருப்பவன், அவளுடைய கணவன் அல்ல. முகம் தெரியாத அந்தப் பெண்ணின் மீது வைத்திருந்த புனிதமான பிம்பம் நொறுங்கி விட்டதில்,  அவளைக் கொன்று விடலாமா என்கிற வெறி ராச்சலுக்கு வருகிறது.


ஒருநாள் குடி மயக்கத்தில் ராச்சல் வீடு திரும்பும் சமயத்தில் அந்த இளம் பெண்ணை காண்கிறாள். ஆத்திரத்துடன் அவளை நோக்கி கூவிக் கொண்டே செல்லும் போது  'மடார்' என்று தான் தாக்கப்பட்டது மட்டும்தான் அவளுக்கு தெரியும். விடிந்த போது ரத்தக் காயங்களுடன்  சாலையில் கிடப்பதை உணர்வாள். என்ன நடந்தது என்பதை அவளால் நினைவு கூரவே முடியாது.


சில நாட்கள் கழித்து அவளைத் தேடி போலீஸ் வரும். இளம் பெண் காணாமற் போயிருக்கும் தகவல் அப்போதுதான் அவளுக்கு  தெரிய வரும். "குறிப்பிட்ட நாளின் நேரத்தில் நீ எங்கு இருந்தாய், என்ன செய்து கொண்டிருந்தாய்?'  போலீஸ் கேட்கும் கேள்விகளுக்கு ராச்சலால் சரியாக பதில் சொல்ல இயலாது. அவள் மீது போலீஸ் சந்தேகப்படுகிறது என்று தோன்றும். 'இனிமேல் நீ உன் முன்னாள் கணவனின் வீட்டருகே செல்லக்கூடாது' என காவல்துறை அதிகாரி எச்சரிப்பாள்.

***

ராச்சலுக்கு ஒரே குழப்பம். 'அந்த நாளின் இரவில் என்னதான் நடந்தது?'  தான் யாரால் தாக்கப்பட்டோம்? அந்தப் பெண் ஏன் காணாமல் போனாள்?

இளம்பெண்ணின் வீட்டிற்கு ராச்சல் செல்கிறாள். முரட்டுத்தனமாக தோன்றுகிற அவளுடைய கணவனிடம் "உன் மனைவியை வேற்று ஆடவன் முத்தமிட்டுக் கொண்டிருந்ததை நான் பார்த்தேன்' என்கிறாள். போலீஸ் அவனையும் சந்தேகப்படுகிறது என்பதால் இந்த தகவல் அவனுக்கு ஆச்சரியத்தை தரும். மட்டுமல்ல, தன் மனைவியின் துரோகம் குறித்து கோபமும் வரும்.

சில புகைப்படங்களைக் காட்டி அடையாளம் காட்டச் சொல்வான் அந்த முரடன். ராச்சல் அவற்றில் ஒருவனை சரியாக அடையாளம் சொல்வாள். அந்த நபர் - மேகனுக்கு உளச்சிகிச்சை தந்து கொண்டிருந்த மருத்துவர்.


***

சில நாட்களில் மேகனின் சடலம் அழுகிய நிலையில் புதர்ப்பகுதியிலிருந்து கிடைக்கிறது. அவள் காணாமல் போகவில்லை. கொலை செய்யப்பட்டிருக்கிறாள். மேகனின் கணவனின் மீீது போலீஸின் சந்தேகம் அதிகமாகும். பத்திரிகைகளில் பரபரப்பு ஏற்படும்.

ராச்சல் அந்த நாளின் சம்பவங்களை மெல்ல மெல்ல நினைவுக்கு கொண்டு வர முயல்வாள்.. ஆம்.. அன்று அவளை  தாக்கியது, அவளுடைய முன்னாள் கணவன். தன் குடும்பத்தையே ராச்சல் சுற்றிச் சுற்றி வருவதால் எரிச்சலடைந்து இவளைத் தாக்கி விடுவான். அதே நாளில்தான் மேகனின் மரணமும் நடக்கிறது.

தனது வீீட்டில் தாதியாக பணிபுரிந்து கொண்டிருந்த 'மேகனுடன்' அவன் ரகசிய உறவு வைத்திருக்கிறான். தான் கர்ப்பமுற்றிருப்பதாக மேகன் சொல்லும் போது எரிச்சல் அடைகிறான். ஆள் நடமாட்டமில்லாத பகுதியில் இவர்களின் சர்ச்சை நடக்கும் போது ஆத்திரத்துடன் அவளைக் கொன்று விடுகிறான்.


***

இந்த உண்மைகளைத் தெரிந்து கொண்ட ராச்சல் நேராக தன் பழைய கணவனின் வீட்டிற்கு செல்வாள். அவனிடம் இது குறித்து கேட்கும் போது ராச்சலையும் அவன் கொல்ல முயல்கிறான். பதிலுக்கு ராச்சல் தாக்கியதில் அவன் ஏறத்தாழ இறந்து போகிறான். அவனுடைய தற்போதைய மனைவி அன்னாவும் வந்து தாக்கி அவனுடைய கதையை முழுவதுமாக முடிக்கிறாள். அவன் தன்னையும் ஏமாற்றிக் கொண்டிருந்த விஷயம் அவளுக்கு தெரிந்திருக்கும்.

இருவரும் காவல்நிலையத்திற்கு செல்வதோடு படம் நிறையும்.  ராச்சலுக்கு இருந்த மனக்குழப்பத்தை பயன்படுத்திக் கொண்டு எல்லாப் பழியையும் ராச்சல் மீது போட்ட கயவனை பழிவாங்கிய திருப்தி அவர்களுக்கு இருக்கும்.

ராச்சலாக நடித்த Emily Blunt-ன் நடிப்பு அற்புதம். குடிப்பழக்கத்திலிருந்து மீள முடியாத தடுமாற்றம், தன் வாழ்வு குறித்த வெறுமை ஆகிய உணர்ச்சிகளை மிக அபாரமாக வெளிப்படுத்தியிருந்தார். வித்தியாசமான  திரைக்கதையின் மூலம் இயக்கியிருந்தவர் Tate Taylor.


(குமுதம் சினிமா தொடரில் பிரசுரமானது)


suresh kannan

Tuesday, June 02, 2020

Elle (2016) - ‘அவள் அப்படித்தான்'






ஹாலிவுட் திரைப்படங்களை் பெரும்பாலும்  சாகசங்களை அடிப்படையாகக் கொண்டிருக்கும் போது, ஐரோப்பிய திரைப்படங்கள் மனிதர்களின் பல்வேறு உணர்ச்சிகளை, அதன் சிக்கல்களை மையமாகக் கொண்டிருக்கும். 'அவள்' என்ற அர்த்தம் வரும்படியான தலைப்பைக் கொண்டிருக்கும் இத்திரைப்படம் ஒரு சைக்காலஜி திரில்லர். மிஷேல் எனும் நடுத்தர வயதுப் பெண்ணுக்கு நிகழும் ஓர் அசாம்பாவிதத்தையொட்டி நகரும் திரைக்கதை. பல்வேறு சர்வதேச விருதுகளை பெற்ற இத்திரைப்படம், பிரான்சின் சார்பாக ஆஸ்கர் விருதிற்கு அனுப்பப்பட்டிருந்தது.

***

'வீடியோ கேம்' தயாரிக்கும் நிறுவனத்தை, தனது தோழி அன்னாவுடன் இணைந்து நடத்துகிறாள் மிஷேல். விவாகரத்தான அவளுக்கு அன்னாவின் கணவனுடன் ரகசியத் தொடர்பு இருக்கிறது. இந்த நிலையில் ஒருநாள் முகமூடி அணிந்த மர்ம நபர் ஒருவனால் மிஷேல் மூர்க்கமாக வன்கலவி செய்யப்படுகிறாள். அவனால் தாம் மறுபடியும் தாக்கப்படக்கூடும்  என்கிற  அச்சம் மிஷேலுக்கு இருக்கிறது. எனவே அது குறித்தான எச்சரிக்கையுடன் இருக்கிறாள். தன் பகற்கனவுகளில், தன்னைத் தாக்கியவனை பதிலுக்கு விதம்விதமாய் தாக்குவது போல கற்பனை செய்கிறாள்.

இந்த அசம்பாவிதம் குறித்து தனது நண்பர்களிடம் சொல்கிறாள் மிஷேல். 'போலீஸிற்கு போ" என்கிற அவர்களின் ஆலோசனையை ஏற்க அவள் தயாராக இல்லை. அதற்கான காரணம் அவளது இளமைப்பருவத்தில் உறைந்திருக்கிறது. மிஷேல் சிறுவயதாக இருக்கும் போது அவளது தந்தை அக்கம்பக்கம் வீடுகளில் உள்ள நபர்களை கொடூரமாகக் கொன்று காவல்துறையில் மாட்டிக் கொள்கிறார். அந்த பரபரப்பான வழக்கின் விசாரணை, பல வருடங்களுக்குப் பிறகு இறுதிக் கட்டத்தை அடைந்திருக்கிறது. இதற்காக தனது தந்தையை கடுமையாக வெறுக்கும்  மிஷேலுக்கு போலீஸ் என்றாலே அலர்ஜியாக இருக்கிறது.

மிஷேலுக்கு நிகழ்ந்த சம்பவம் எப்படியோ பரவி, அவளது கம்பெனியிலேயே எவரோ அது குறித்ததொரு 'அனிமேஷன்' படத்தை உருவாக்குகிறார்கள். தன்னைத் தாக்கியவன் அவனாக இருக்கும் என்று மிஷேல் சந்தேகப்படுகிறாள். அது குறித்து ரகசியமாக ஆராய்கிறாள்.


***

எதிர் வீட்டில் இருக்கும் பாட்ரிக் எனும் ஆசாமி மீது மிஷேலுக்கு ஈர்ப்பு இருக்கிறது. சமயங்களில் ஒளிந்திருந்து அவனை ரகசியமாக கவனித்து மகிழ்கிறாள். பாட்ரிக்கின் குடும்பத்தை விருந்திற்காக தன் வீட்டிற்கு அழைக்கிறாள்.  தன் விருப்பத்தை சூசகமாக அவனிடம் தெரிவிக்கிறாள். இருவருக்குள்ளும் நட்பும் இணக்கமும் உண்டாகிறது.

மிஷேலின் தாய் ஓர் இளைஞனை திருமணம் செய்ய உத்தேசிக்கிறாள். மிஷேலுக்கு இது பிடிப்பதில்லை. விருந்தின் போது தன்னுடைய எதிர்ப்பை கிண்டலாக எதிரொலிக்கிறாள். மிஷேலின் மகனுக்கு ஓர் அடங்காப்பிடாரி மனைவி. பொருளாாதாரக் காரணங்களுக்காக தாயைச் சார்ந்திருக்கிறான் மகன். இது குறித்த சச்சரவுகளும் ஏற்படுகின்றன.

இந்த நிலையில் முகமூடி மனிதனின் வருகை மீண்டும் நிகழ்கிறது.  மிஷேலை தாக்கி அவளுடன் கட்டாயமாக உறவுகொள்ள முயல்கிறான். மிஷேல் இதை மனதளவில்  எதிர்கொள்ள தயாராக இருந்ததால் , இம்முறை பதிலுக்கு துணிச்சலுடன் அவனைத் தாக்குகிறாள். அவன் யாரென்று அடையாளம் தெரிவதில் அவளுக்கு அதிர்ச்சி ஏற்படுகிறது. எதிர்வீட்டு பாட்ரிக்.

***

எதிரி யாரென்கிற அடையாளம் தெரிந்து விட்ட போதிலும் அவனுடன் தொடர்ந்து பழக வேண்டிய நிலைமை மிஷேலிற்கு. காவல்துறையிடமும் செல்ல முடிவதில்லை.. ஆகவே பூனை - எலி விளையாட்டைத் துவங்குகிறாள். அவனைப் பழிவாங்க வேண்டும் என்று தோன்றினாலும்  ஒருபக்கம் அவன் மீது ஈர்ப்பும் இருக்கும் விசித்திரமான நிலைமை.

மிஷேல் ஒரு விபத்தில் சிக்கிக் கொள்ளும் போது உதவ யாருமில்லாத நிலையில் பாட்ரிக் வந்து காப்பாற்றுகிறான். ஒரு நாளின் தனிமையில் உறவிற்காக பாட்ரிக் அழைக்கிறான். மிஷேல் மனதளவில் அதற்கு தயாராக இருந்தாலும் முந்தைய சம்பவத்தைப் போலவே அவளை அடித்துத் துன்புறுத்தி வக்கிரத்தனமாக தன் வேலையை முடிக்கிறான். மிஷேலுக்குள் வெளிக்காட்டாத வன்மம் பொங்குகிறது.

தன்னுடைய நிறுவனத்தின் புதிய 'வீடியோ கேம்' ஒன்று சிறப்பாக அமைந்ததையொட்டி விருந்திற்கு ஏற்பாடு செய்கிறாள் மிஷேல். பாட்ரிக் குடும்பம் உட்பட அனைவரையும் அழைக்கிறாள். தன் தோழி அன்னாவிடம் 'உன் கணவருடன் எனக்கு தவறான உறவுமுறை இருந்தது' என்று உண்மையை ஒப்புக் கொள்கிறாள். விருந்தின் இடையே 'நான் கிளம்புகிறேன்' என பாட்ரிக்கை மட்டும் அழைத்துக் கொண்டு கிளம்புகிறாள்.

வீட்டிற்கு செல்லும் வழியில் 'உன்னைப் பற்றி போலீஸில் சொல்லலாம் என்றிருக்கிறேன்'  என்று பாட்ரிக்கிடம் செல்கிறாள். அவள் எதிர்பார்த்தபடியே சிறிது நேரத்தில் பாட்ரிக் அவளது வீட்டிற்கு வருகிறான். வழக்கம் போல அவளை மூர்க்கமாக அடித்து உறவு கொள்ள முயற்சிக்கிறான். பாட்ரிக்கின் தலையில் 'மடார்' என்று எவரோ அடிக்கிறார்கள். மிஷேலின் மகன். பாட்ரிக் இறந்து போகிறான்.

'இந்த ஆம்பளைங்கே இப்படித்தான்' என்றபடி மிஷேலும் அன்னாவும் நடந்து செல்லும் காட்சியோடு படம் நிறைவுறுகிறது.

***

'பெண்ணின் மனது ஆழம்' என்பது சலிக்க சலிக்க சொல்லப்பட்டு விட்ட வாக்கியம் என்றாலும் அதில் பெரும்பாலும் உண்மையுள்ளது. பெண்களின் மனது எவ்வாறெல்லாம் விசித்திரமாக இயங்கும் என்பதை அழுத்தமாக  நிரூபிக்கும் திரைப்படம் இது. மிஷேலாக நடித்த Isabelle Huppert-ன் அற்புதமான நடிப்பு விமர்சகர்களால் பெரிதும் பாராட்டப்பட்டது. 'Black Book'  போன்ற பல சிறப்பான திரைப்படங்களை இயக்கியிருக்கும் டச்சு இயக்குநர் Paul Verhoeven, நான்கு ஆண்டுகள் இடைவெளிக்குப் பிறகு இயக்கியிருக்கும் முதல் பிரெஞ்சு திரைப்படம் இது.

(குமுதம் சினிமா தொடரில் பிரசுரமானது)


suresh kannan

Monday, June 01, 2020

The Accountant (2016) - ‘இயந்திரக் கணிதன்'





இத்திரைப்படம் வழக்கமானதொரு ஆக்ஷன் திரில்லர் அல்ல.  ஆட்டிஸம் போன்ற மாற்றுத்திறன் கொண்ட நபர் தொடர்பான திரைப்படம் என்றால் பொதுவாக அழுகாச்சியாக அல்லது மெலோ டிராமாக இருக்கும். ஆனால் அத்தகைய நபர் ஒருவரை சாகசங்களோடு இணைத்ததே இத்திரைப்படத்தின் சுவாரசியமான அம்சம். Ben Affleck  இந்தப் பாத்திரத்தை ரகளையாக கையாண்டுள்ளார்.


***


ஆட்டிஸ குறைபாடுள்ள சிறுவனான கிறிஸ் அதிக ஆக்ரோஷமானவனாக இருக்கிறான். 'அதிக வெளிச்சம், சப்தம் இவர்களை பாதிக்கும். சிறிது காலத்திற்கு அவனை என்னிடம் விட்டு விடுங்கள்' என்கிறார் சிறப்பு மருத்துவர். ஆனால் ராணுவத்தில் பணிபுரியும் தந்தை, அதற்கு முரணான கருத்தைச் சொல்கிறார். 'எது அவனைப் பாதிக்கிறதோ, அதனை நோக்கியே அவன் தீவிரமாகச் செல்ல வேண்டும். அதுதான் சரியான மருந்து' என்று கிறிஸ்ஸையும் அவனது சகோதரனையும் கடுமையான சண்டைப் பயிற்சியில் ஈடுபடுத்துகிறார். இதனால்் கிறிஸ்ஸின் தாய் இவர்களை விட்டுப் பிரிந்து சென்று விடுகிறார்.

வளர்ந்த கிறிஸ் கணக்கில் அசகாய சூரப்புலியாக இருக்கிறான். எத்தனை சிக்கலான கணக்குகளையும் மனதிலேயே போட்டு விடைகாணும் திறமையுள்ளவன். குறி பார்த்து சுடுவதிலும் கெட்டிக்காரன். பயங்கரவாதிகளின் கணக்குகளில் சீர்திருத்தம் செய்து சம்பாதிக்கும்  ஆபத்தான பணியில்  இருக்கிறான். அனாமதேய பெண் குரலொன்று அவனுக்கு உதவியாளராக இருக்கிறது.  ரோபோட்டிக்ஸ் நிறுவனம் ஒன்று, தங்களின் கம்பெனி கணக்குகளில் உள்ள கோளாற்றை சீர்செய்வதற்காக கிறிஸ்ஸை அணுகுகிறது.

இது ஒருபுறமிருக்க, டிரெஷரி ஏஜெண்ட்டான ரேமண்ட் கிங், பயங்கரவாதிகளின் கணக்குகளை ஆராய்கிறார். அவர்களுக்கு உதவும் 'அக்கவுண்டண்ட்' என்கிற பெயர் மட்டும் கிடைக்கிறது. தனது உதவியாளராக மெடினாவை அழைக்கிறார். "நீ இவனைக் கண்டுபிடித்தேயாக வேண்டும். இல்லையென்றால் உன் வேலை போய் விடும். உன்னுடைய பழைய க்ரைம் ரெக்கார்டுகள் என்னிடம் இருக்கின்றன". எனவே மெடினா தேடுதலில் தீவீரமாக ஈடுபடுகிறாள்.

***

ரோபோட்டிக்ஸ் நிறுவன கணக்குகளில் நிகழ்ந்துள்ள முறைகேடுகளை கிறிஸ் கண்டுபிடிக்கிறான். அந்தக் கம்பெனியின் உயர்அதிகாரி கொல்லப்படுகிறார். கிறிஸ் மோசடிகளை முழுவதுமாக முடிக்கும் முன்பு நிறுவனத்தின் தலைவர்  இவனிடம் வந்து அதை நிறுத்துமாறு கூறுகிறார். கிறிஸ்ஸின் இயல்புப் படி ஒன்றை துவக்கி விட்டால் அதை முழுவதுமாக முடிக்காமல் அவனால் இயல்புத்தன்மையை அடைய முடியாது. எனவே இந்த வேலையை தனக்கு தந்த பெண்மணியைப் பார்க்கச் செல்கிறான். ஆனால் அவளும் கொல்லப்பட்டிருக்கிறாள்.

கிறிஸ்ஸையும் கொல்வதற்கான சம்பவங்கள் நடக்கின்றன. மிகத் திறமையாக தப்பிக்கிறான். ரோபாட்டிக்ஸ் நிறுவனத்தில் தனக்கு உதவியாளராக இருந்த இளம்பெண்ணை கொல்லப் போகிறார்கள் என்று அறிகிறான். அவளும் நிதி மோசடி பற்றி அறிந்தவள். அவளைக் காப்பாற்றுகிறான். அவளைத் தன் ரகசிய இடத்திற்கு அழைத்து வந்து  தன் பழைய வரலாற்றைக் கூறுகிறான்.

'அக்கவுண்டன்ட்' யார் என்கிற தேடுதலில் ஈடுபட்டிருக்கும் மெடினா, மிகச் சிரமப்பட்டு கிறிஸ்ஸின் பெயரை கண்டுபிடித்துவிடுகிறாள். அவளும் டிரெஷர் ஏஜெண்ட் ரேமண்ட் கிங்கும், கிறிஸ்ஸின் வீட்டிற்கு செல்கிறார்கள். கிறிஸ் அங்கு இருப்பதில்லை.

***

மெடினாவிடம், ரேமண்ட் கிங்   சில ஆண்டுகளுக்கு முன்பு நடந்த பழைய சம்பவம் ஒன்றை பகிர்கிறார். பயங்கரவாதிகளை கண்காணித்துக் கொண்டிருந்த சமயத்தில் துப்பாக்கி சப்தம் கேட்டு உள்ளே நுழைகிறார். வழியெங்கும் பயங்கரவாதிகள் இறந்து கிடக்கிறார்கள். அவருடைய தலையின் பின்னால் ஒரு துப்பாக்கி. "நீ உன் பிள்ளைகளுக்கு நல்ல தகப்பனாக இருந்தாயா?" என்று  கேள்வி கேட்கப்படுகிறது. "ஆம்" என்கிறார் ரேமண்ட் பயத்துடன். அவரைக் கொல்லாமல் விடுகிறான் 'அக்கவுண்டன்ட்' ஆன கிறிஸ்.

ரோபாட்டிக்ஸ் நிறுவன தலைவரின் வீட்டிற்கு செல்கிறான் கிறிஸ். அங்கு பலத்த பாதுகாப்பு. நவீன துப்பாக்கிகளுடன் ஆட்கள். எல்லோரையும் வீழ்த்தினாலும் கூட்டத்தின் தலைவனுடன் சண்டையிட நேர்கிறது. அவன் கிறிஸ்ஸின் சகோதரன். பல ஆண்டுகளுக்குப் பின்னால் அவர்கள் சந்திக்கிறார்கள். நிறுவனத் தலைவரை கிறிஸ் சுட்டுக் கொல்கிறான். ரேமண்ட் கிங் வகித்த பதவியை மெடினா அடைகிறாள்.

***

'அவர்கள் குறைபாடுள்ளவர்கள்'  என்றும் 'நாம் இயல்பானவர்கள்' என்று எப்படி நிச்சயமாக சொல்ல முடியும்? என்கிற தத்துவார்த்தமான கேள்வியுடன் படம் நிறைகிறது. இவ்வாறான சிறப்புத் தன்மையுள்ள நபர்கள் ஒருவகையில் அசாதாரணமானவர்கள். பொங்கி வழியும் அவர்களின் செயலாற்றல் சரியான வழியில் திசை திருப்பப்பட்டால் பல அசாதாரணமான விஷயங்களை அவர்கள் செய்வார்கள். ஆனால் அது தவறான திசையாக இருக்கக்கூடாது என்பதை படம் அழுத்தமாக உணர்த்துகிறது.

ஆட்டிஸக் குறைபாடுள்ள கிறிஸ் ஆக பென் அஃப்லெக் அற்புதமாக நடித்திருக்கிறார். படம் முழுவதும் இறுக்கமான முகத்துடன் சுருக்கமான வார்த்தைகளில் அந்தப் பாத்திரத்திற்கு உயிர் தந்திருக்கிறார். சற்று குழப்பமான திரைக்கதையாக இருந்தாலும்  சுவாரசியமான திரைப்படத்தை தந்திருக்கிறார் இயக்குநர் Gavin O'Connor.


(குமுதம் சினிமா தொடரில் பிரசுரமானது)


suresh kannan

Sunday, May 31, 2020

Tickets (2005) - ‘டிக்கெட், டிக்கெட்'




இத்திரைப்படம் மூன்று தனித்தனியான பகுதிகளைக் கொண்டது. பயணச்சீட்டு எனும் பொதுவான விஷயம் இவற்றை இணைப்பதாக இருக்கிறது. இதன்  காட்சிகள் மொத்தமுமே ஓடும் ரயிலில் நிகழ்பவை. Ermanno Olmi, Abbas Kiarostami, Ken Loach ஆகிய மூன்று இயக்குநர்களின் பங்களிப்பில் உருவானது . மூன்று பகுதிகளுமே ஒவ்வொரு நோக்கில் உணர்வுபூர்வமான விஷயங்களைக் கையாள்கின்றன.

***

முதல் பகுதி: ரோமிற்குச் செல்லும் ரயில்.  இதில் பயணம் செய்கிறார் ஒரு விஞ்ஞானி. முதியவரான அவர், தன்னுடைய பயண ஏற்பாடுகளை திறமையாகச் செய்த இளம் பெண்ணை நினைத்துப் பார்க்கிறார். அவளால் வசீகரிக்கப்படுகிறார். அவளுடன் உரையாடிய சம்பவங்கள் பகற்கனவுகளுடன் இணைந்து மனதிற்குள் விரிகின்றன.

முதல் வகுப்பில் அமர்ந்திருக்கும் இவருக்கு எதிரேயுள்ள தடுப்பிற்கு பின்னால் அமர இருக்கை இல்லாமல் பரிதவிக்கும் எளிய மக்கள். அல்பேனியாவிலிருந்து வரும் அகதிகளின் குடும்பம் அதில் இருக்கிறது. சிறிய குழந்தையுடன் ஒரு தாய். தன்னுடைய பகற்கனவுகளின் இடையே தாயையும் பாலுக்காக அழும் குழந்தையையும் கவனிக்கிறார் விஞ்ஞானி. நின்று கொண்டிருக்கும் கூட்டத்திடம் ராணுவ அதிகாரி கடுமையாக நடந்து கொள்கிறான். குழந்தைக்காக தயார் செய்யப்படும் பாலை அவன் தவறுதலாக  தட்டி விட்டு விடுகிறான். குழந்தை பசியால் அழுகிறது.

வெதுவெதுப்பான பாலை 'ஆர்டர்' பெரியவர். மற்றவர்கள்  இவரை ஆச்சரியமாக பார்க்க, மெல்ல எழுந்து தடுப்பை கடந்து சென்று பால்  கோப்பையை தாயிடம் தருகிறார்.



***

இரண்டாவது பகுதி இது. ரயில் நின்று கடக்கும் ஒரு நிறுத்தத்தில் ஏறுகிறார் அந்த மூதாட்டி. அவருடன் ஓர் இளைஞன். மகனைப் போல தோன்றுகிறான்.  ஆனால் கிழவி அந்த இளைஞனை அடிமை போல நடத்துகிறார். இளைஞன் கழிவறைக்குச் சென்றிருக்கும் நேரத்தில் எதிர் இருக்கையில் ஒருவர் வந்து அமர்கிறார். மூதாட்டி பேசிக் கொண்டிருக்கும் மொபைல் போன் தன்னுடையது என்கிறார்.  இருவருக்கும் வாக்குவாதம் நீள்கிறது. பார்த்துக் கொண்டிருக்கும் நமக்கு கிழவியின் மீதுதான் சந்தேகம் வருகிறது.

ரயில்வே அதிகாரியிடம் முறையிடப்படுகிறது. அவர் தன் மொபைல் போனிலிருந்து எதிர் இருக்கை நபரின் மொபைலுக்கு போன் செய்ய, அதற்கும் பக்கத்து இருக்கையில் போன் அடிக்கிறது. தன்னுடைய தவறுக்கு மன்னிப்பு கூட கேட்காமல் அந்த ஆசாமி செல்கிறார். மூதாட்டிக்கு கோபத்திற்கு இடையில் துக்கமும் பொங்குகிறது. ராணுவ அதிகாரியாக பணிபுரிந்த  கணவனின் முதலாவது ஆண்டு நினைவுதின சடங்கிற்காக அவர் சென்று கொண்டிருக்கிறார்.

மறுபடியும் இன்னொரு கலாட்டா ஆரம்பமாகிறது. மூதாட்டியும் இளைஞனும் அமர்ந்திருக்கும் இருக்கைகள், தாங்கள் முன்பதிவு செய்தது என்று கூறி இரண்டு நபர்கள் வருகிறார்கள். மறுபடியும் வாக்குவாதம். 'அந்நியன்' திரைப்படத்தின் விக்ரம் போல 'ட்ட்டிஆர்' என்று அவர்கள் கூவ, ரயில்வே அதிகாரி பஞ்சாயத்திற்கு வருகிறார். மூதாட்டியின் பயணச்சீட்டுகளை சோதித்துப் பார்த்தால் அதே இருக்கை எண்கள். ஆனால் இரண்டாம் வகுப்பிற்கானது. கிழவி எழுந்து செல்ல மறுக்கிறார். இரக்கப்படும் டிக்கெட் பரிசோதகர், முதல் வகுப்பிலேயே ஒரு வசதியான இடத்தை ஒதுக்கித் தருகிறார்.

கிழவியுடன் வந்திருக்கும் இளைஞன் ரயிலில் பயணிக்கும் ஓர் இளம் பெண்ணுடன் பேசிக் கொண்டிருக்கிறான். இளைஞன் பிறந்து வளர்ந்த பிரதேசத்தைச் சேர்ந்தவள் அவள். எனவே பழைய கதைகள், இளைஞனின் காதலி தொடர்பான சம்பவங்கள் உரையாடலில் வருகின்றன. ஆனால் இளைஞனை அவ்வப்போது அதிகாரத்துடன் அழைக்கும் கிழவி, 'ஏன் கூப்பிட்டவுடன் வரவில்லை' என்று கோபித்துக் கொள்கிறாள்.

அவர்கள் இறங்க வேண்டிய இடம் நெருங்குகிறது. கிழவிக்கு உடைமாற்ற உதவுகிறான் இளைஞன். அவன் பொறுமையுடன் உதவினாலும் கிழவி தொடர்ந்து குறை சொல்லிக் கொண்டே இருப்பதால் எரிச்சல் தாங்காமல் அங்கிருந்து காணாமற் போய்  விடுகிறான். கிழவி அவனைத் தேடி அலைகிறார். தன்னுடைய சுமைகளை எப்படி இறக்குவது என தவிக்கும் அவருக்கு, முன்னர் செல்போனிற்காக சண்டை போட்ட நபர் உதவுகிறார்.

***

மூன்றாவது பகுதி: மூன்று இளைஞர்கள். ரோமில் நடக்கும் கால்பந்து போட்டியைக் காண்பதற்காக உற்சாகமாக செல்கிறார்கள். இதற்காக அவர்கள் நீண்ட காலமாக திட்டமிட்டிருக்கிறார்கள்..

அகதிக் குடும்பத்தைச் சேர்ந்த சிறுவன் வழியில் தென்படுகிறான். அவனிடம் தங்கள் பயணத்தைப் பற்றி சொல்கிறார்கள். தங்களிடமிருக்கும் சாண்ட்விச்சை அவனுக்குத் தருகிறார்கள். தங்களின் இருக்கைக்கு வந்து மீண்டும் உற்சாகமாக பேசிக் கொண்டிருக்கிறார்கள். அகதிக் குடும்பம் அந்த ஒற்றை சாண்ட்விச்சை தங்களுக்குள் பங்கு போட்டு சாப்பிடுவதைப் பார்த்ததும் கருணை சுரந்து தங்களிடம் மிகுதியாக உள்ள சாண்ட்விச்சுகளை தந்து விடுகிறார்கள்.

பயணச்சீட்டு பரிசோதகர் வருகிறார். மூன்று இளைஞர்களில் ஒருவனின் டிக்கெட் காணவில்லை. தனது பாக்கெட் முழுக்க தேடுகிறான். 'இந்தப் பயணத்தை பாழடிக்கிறாயே' என்று அவர்களுக்குள் சண்டை மூள்கிறது. திரும்பி வருவதற்குள் டிக்கெட் தரவில்லையென்றால் 'போலீஸை கூப்பிடுவேன்' என்கிறார் அதிகாரி. சற்று நிதானமாக யோசித்துப் பார்க்கும் போது அகதிச் சிறுவன் அந்த டிக்கெட்டை திருடியிருப்பான் என்கிற முடிவிற்கு வருகிறார்கள்.

சற்று நேரத்திற்கு முன் இரக்கம் காட்டியே இவர்களே, அந்தக் குடும்பத்திடம் சென்று முரட்டுத்தனமாக சண்டையிடுகிறார்கள். அந்தக் குடும்பத்தின் பெண் இவர்களிடம் மன்றாடுகிறாள். தங்களின் சோகக் கதையை கண்ணீருடன் விவரிக்கிறாள். டிக்கெட்டை பறிகொடுத்த இளைஞனுக்கு பரிதாபம் உண்டாகிறது. 'உனக்கென்ன தலையெழுத்தாடா?' என்று இன்னொரு இளைஞன் கத்துகிறான்.

ரயில்  ரோம் நகரை வந்தடைகிறது. டிக்கெட் இல்லாத இளைஞனை காவல் அதிகாரிகள் பிடித்துச் செல்கிறார்கள். அகதிகளின் குடும்பம் நீண்ட காலம் பிரிந்திருந்த அவர்களின் குடும்பத்தலைவருடன் கண்ணீருடன் இணைகிறது. காவல் அதிகாரியின் பிடியிலிருந்து இளைஞர்கள் உற்சாகமாக தப்பி ஓடுகிறார்கள்.

**

விதம் விதமான மனிதர்கள், அனுபவங்கள். ஓடும் ரயிலில் நாமும் பயணம் செய்யும் அனுபவத்தை  தருகிறது இந்த திரைப்படம்.

(குமுதம் சினிமா தொடரில் பிரசுரமானது)


suresh kannan

Saturday, May 30, 2020

Wolf Totem (2015) - ‘ஓநாய் வேட்டை'





ஓர் ஓநாயை வளர்ப்பதின் மூலமாக இயற்கையை புரிந்து கொள்ள முயல்கிறான் நகரத்து இளைஞன் ஒருவன். அவனது நோக்கம் நிறைவேறியதா என்பதை தத்துவார்த்தமாகவும் அரசியல் பொருளிலும் விவரிக்கிறது இந்த சீனத் திரைப்படம்.  Jiang Rong எழுதிய நாவலை அடிப்படையாக கொண்டு உருவாக்கப்பட்ட இத்திரைப்படத்தை இயக்கியிருப்பவர் Jean-Jacques Annaud. பல  மொழிகளில் மொழிபெயர்க்கப்பட்ட இந்த நாவல், கம்னியூசத்தின் மீதான விமர்சனமாக கருதப்படுகிறது.

***

வருடம் 1969. பீஜிங் நகரில் இருந்து மங்கோலிய பழங்குடிகள் இருக்கும் இடத்திற்கு அனுப்பப்படுகிறான் இளைஞன் சென். சீனா உருவாக்க விரும்பிய கலாசாரப் புரட்சியின் படி  நகரத்திலிருந்து சில வருட காலத்திற்கு இடம்பெயரும் சென், பழங்குடி சிறார்களுக்கு கல்வி கற்றுத் தருவான். ஆனால் இதற்கு மாறாக பழங்குடி மக்களிடமிருந்தும், மலைப்பிரதேசத்தில் இருக்கும் ஓநாய்க்கூட்டங்களிடமிருந்தும் நிறைய விஷயங்களைக் கற்கிறான் சென்.

பழங்குடிகளின் இருப்பிடத்தை அடைந்ததும் ஊர்ப் பெரியவர், பாதுகாப்பு சாதனம் ஒன்றை சென்னுக்கு அளிக்கிறார். ஓநாய்களிடமிருந்து காப்பாற்றிக் கொள்வதற்காக உதவுவது அது. சில காலம் கழித்து குதிரை மீது தனியாகச் செல்லும் சென்-ஐ ஓநாய்களின் கூட்டமொன்று சுற்றி வளைக்கிறது. திகைத்துப் போகும் சென், பெரியவர் சொல்லித் தந்தபடி தன்னிடமுள்ள உலோகங்களை மோதச் செய்து சப்தம் ஏற்படுத்துகிறான். ஓநாய்கள் பயந்து ஓடுகின்றன. ஓநாய்களைப் பற்றி மேலதிமாக அறிந்து கொள்ளும் ஆர்வம் அவனுக்கு உண்டாகிறது.

'ஓநாய்கள் மிகவும் கட்டுப்பாடானவை. தன் வேட்டைக்காக எத்தனை காலமானாலும் பொறுமையுடன் காத்திருக்கும். கூட்டத்தின் தலைவன் தரும் சமிக்ஞைகளின் படி போர் வியூகம் அமைத்து  தன் இரையை சுற்றி வளைத்து வேட்டையாடும். மங்கோலிய பேரரசன் செங்கிஸ்கான், குறைந்த அளவு படைவீரர்களை வைத்துக் கொண்டு உலக நாடுகளை வெற்றி கொண்டது, ஓநாய்களின் போர்த்திறனை பார்த்து கற்றுக் கொண்ட பின்புதான்.' என்கிற தகவல்களையெல்லாம் சொல்கிறார் பெரியவர்.

***

ஓநாய்களை பின்தொடர்ந்து சென்று அவைகள் வேட்டையாடி பனியில் புதைத்து வைத்திருக்கும் மான்களை பழங்குடிகள் எடுத்து வருகிறார்கள். "ஏன் எல்லா மான்களையும் நாமே எடுத்துக் கொள்ளக்கூடாது?" என்று கேட்கிறான் சென். "அவைகளின் இரையை முழுக்கவும் நாம் எடுத்து விட்டால் ஓநாய்கள் இரையைத் தேடி ஊருக்குள் வந்து விடும்' என்கிறார் பெரியவர்.  மனிதனுக்கும் விலங்கிற்கும் உள்ள எழுதப்படாத ஒப்பந்தம் இது. இதன் மூலம் இயற்கையின் சமநிலையும் பேணப்படும்.


தனக்கு கிடைக்கும் ரேடியோ பெட்டிற்காக  மீதமுள்ள மான்களை ஒருவன் அரசாங்க அதிகாரிக்கு காட்டிக் கொடுத்து விட அவர்கள் வந்து அள்ளிப் போகிறார்கள். அவற்றின் தோலிற்கு நல்ல விலை கிடைக்கும். தங்களின் இரை பறிபோன வெறுப்பில் ஓநாய்கள் கொலைவெறியுடன் காத்திருக்கின்றன.

 மேய்ப்பவர்கள் அசந்த நேரம் பார்த்து குதிரைக் கூட்டத்தை ஓநாய்கள் வேட்டையாடத் துவங்குகின்றன. சில நபர்கள் மட்டுமே இருப்பதால் அவர்களால் சமாளிக்க முடியவில்லை.  உயிர் தப்புவதற்காக கண்மண் தெரியாமல் ஓடும் குதிரைகள் பனி நிறைந்த ஆற்றில் மூழ்கி இறக்கின்றன. இந்த இழப்பிற்காக அரசாங்க அதிகாரி எல்லோரையும் திட்டுகிறார். ஓநாய்கள் தங்களைப் பழிவாங்கத் துவங்கி விட்டன என்பதைப் புரிந்து கொள்கிறார் பெரியவர்.


***


ஓநாய்க் குட்டி ஒன்றை வளர்ப்பதின் மூலம் அதன் இயங்குமுறையின் ரகசியங்களை புரிந்து கொள்ள முடியும் என நினைக்கிறான் சென். தாய் ஓநாய் வெளியே சென்றிருக்கும் வேளை பார்த்து அதன் குட்டியொன்றைத் திருடி வருகிறான். எவருக்கும் தெரியாமல் அதை வளர்த்து வருகிறான். பழங்குடிகள் இந்தச் செயலைக் கண்டித்தாலும் அரசாங்க அதிகாரியின் ஆதரவு இருப்பதால் அவனை யாராலும் தடுக்க முடியவில்லை. இதற்காக ஊர்ப்பெரியவரிடம் சென் மன்னிப்பு கேட்கிறான்.

நாளாக நாளாக ஓநாய்க்குட்டி மீது அவனுக்கு அன்பு அதிகமாகிறது. ஒரு நாள் கோபத்தில் அது அவனைக் காயப்படுத்தி விடுகிறது. என்றாலும் கூட அவனால் அதை கோபிக்க முடிவதில்லை. அவனுக்குப் பிரியமான ஒரு பெண்ணின் மகனை, சென் வளர்க்கும் ஓநாய் காயப்படுத்தி விடுகிறது. சிறுவனின் உயிர் பிழைப்பதே கடினம் என்றாகி விடுகிறது. அதற்கான நவீன மருந்தை எங்கெங்கோ அலைந்து திரிந்து கொண்டு வருகிறான் சென். அவளிடம் தன் காதலையும் தெரிவிக்கிறான். 'நீ நகரத்திற்கு போய் விடுவாயே' என்று அவனுடைய காதலை மறுக்கிறாள் அவள். 'இல்லை, இனி இதுதான் என் இடம்' என்கிறான் சென்.

பழங்குடிகளின் ஆட்டு மந்தையை ஓநாய்கள் சூழ்கின்றன. மிக லாவகமாக தடுப்புச் சுவற்றைத் தாண்டி வந்து ஆடுகளை வேட்டையாடுகின்றன. சத்தம் கேட்ட ஊர்க்காரர்கள் ஓநாய்களை துரத்துகிறார்கள். ஓநாய்க்காக வைக்கப்பட்ட வெடியில் சிக்கி ஊர்ப் பெரியவர் காயப்படுகிறார்.

அந்தப் பிரதேசத்தில் உள்ள அனைத்து ஓநாய்களையும் கொன்று விட வேண்டும் என்கிற ஆவேசத்துடன் கிளம்புகிறான் அரசாங்க அதிகாரி. துப்பாக்கியும் ஜீப்புமாக கிளம்பி ஏறத்தாழ அனைத்து ஓநாய்களையும் சுட்டுக் கொல்கிறார்கள்.

சென் வளர்க்கும் ஓநாய் பெரியதாகி விடுகிறது. அவனிடமிருந்து விடுபடத் துடிக்கிறது. சென்னால் அதன் சுதந்திர உணர்வை புரிந்து கொள்ள முடிந்தாலும் அதனை விடுவிக்க முடியாமல் தடுமாறுகிறான். அவன் எங்கோ சென்று திரும்பி வரும் போது ஓநாய்இருப்பதில்லை. அவனுடைய காதலி அதை விடுவித்திருக்கிறாள். மலைப்பிரதேசத்தின் தனிமையில் ஒற்றையாக நின்று ஓலமிடும் ஓநாய் ஒன்றை கவனிக்கிறான் சென். அவன் வளர்த்த ஓநாய்தான் அது. இவனை சற்று நேரம் உற்றுப் பார்த்து விட்டு மலைப்பிரதேசத்திற்குள் ஓடி மறைகிறது. சென் கண்ணீர் வழிய அதைப் பார்க்கிறான்.


***

பழங்குடிகள் இயற்கையோடு இயைந்து வாழத் தெரிந்தவர்கள். மனிதனும் விலங்கும் பரஸ்பரம் ஏற்படுத்திக் கொள்ளும் ஒப்பந்த எல்லைக்குள் வாழப் பழகுகிறார்கள். விலங்குகளின் வாழ்வையும் சுதந்திரத்தையும் அவர்கள் மதிக்கிறார்கள். சென்-ஐப் போல இயற்கையின் ஒரு பகுதியை கைப்பற்ற முடியும் என அவர்கள் கருதுவதில்லை.


ஆனால் நவீன உலகத்தின் சுயநலமும் பேராசையின் அதிகாரமும் இயற்கையின் இந்த சமனைக் குலைக்கின்றன. மனித குலத்தால் இயற்கையை எந்நாளும் வெல்ல முடியாது; புரிந்து கொள்ள முடியாது என்கிற கருத்தினை ஆழமாகப் பதிவு செய்கிறது இத்திரைப்படம்.

ஓநாய்கள் வேட்டையாடும் காட்சிகள், மலைப்பிரதேசத்தின் அழகான காட்சிகள் போன்றவை  இத்திரைப்படத்தில் அற்புதமாக காட்சிப்படுத்தப்பட்டுள்ளன.

(குமுதம் சினிமா தொடரில் பிரசுரமானது)

suresh kannan

Friday, May 29, 2020

பொன்மகள் வந்தாள் - சினிமா விமர்சனம்




‘சிகை’ ‘ஆர்.கே.நகர்’ போன்ற சிறுமுதலீட்டுத் திரைப்படங்கள் ஏற்கெனவே OTT-ல் வெளியாகியிருந்தாலும் திரையரங்க உரிமையாளர்களின் எதிர்ப்பு, தயாரிப்பாளர்களின் ஆதரவு போன்ற சர்ச்சைகளைத் தாண்டி அமேஸான் பிரைமில் வெளியாகியிருக்கும் முதல் பிரபலமான திரைப்படம் ‘பொன்மகள் வந்தாள்’.

அசலான ஏற்பாட்டின் படி திரையரங்கில் வெளியாகியிருக்க வேண்டிய இந்தத் திரைப்படம், கொரானோ பிரச்சினை காரணமாக வெளியீடு தள்ளிப் போய், ஏற்கெனவே செய்து கொண்ட ஒப்பந்தத்தின் படியும் நஷ்டத்தைத் தவிர்க்க வேண்டியும் நேரடி இணைய வெளியீடாக வந்துள்ளது.

தவிர்க்க முடியாத இந்தச் சூழலின் வாயிலாக தமிழ் சினிமாவின் ஒரு புதிய கதவு அதிகாரபூர்வமாக திறந்துள்ளது எனலாம். கொரானோ இடைவெளியில் மக்கள் ஏற்கெனவே அமேஸானிலும் நெட்பிளிக்ஸிலும் குவிந்திருக்கும் போது தமிழ் சினிமாவும் அதிலிருந்து விலகியிருக்க முடியாது. இந்தச் சந்தையின் வழியாக இனி பல்வேறு தமிழ்த் திரைப்படங்கள் OTT-ல் வெளியாகக்கூடும் என்கிற அழுத்தமாக சமிக்ஞையை தந்திருக்கிறது ‘பொன்மகள் வந்தாள்’.

ஆனால் இதன் கூடவே இன்னொரு சோதனையும் இருக்கிறது. பொதுவாக எந்தவொரு தமிழ் திரைப்படம் வந்தாலும் முதலில் அதனுடைய மொக்கையான கள்ள நகல் வெளியாகும். நல்ல பிரிண்ட் வருவதற்கு நான்கைந்து நாட்களாவது ஆகி விடும். ஆனால் ‘பொன்மகள் வந்தாள்’ வெளியான சில மணி நேரங்களுக்குள்ளாகவே பளிங்கு போன்ற பைரஸி பிரிண்ட் வெளிவந்து விட்டது.

வீட்டிற்கே சினிமாவைக் கொண்டு வந்து சேர்க்கும் தொழில்நுட்ப வளர்ச்சியின் அனுகூலங்களைப் போலவே அதன் தவிர்க்க முடியாத கசப்பு பக்கங்கள் இவை.

**

சரி. இத்தனை பெருமையுடன் வெளியான ‘பொன்மகள் வந்தாள்’ ஒரு அதிரடி வெளியீடாக, கனகம்பீரமாக உள்ளே நுழைந்திருக்கிறதா என்று பார்த்தால், ஏமாற்றத்துடன் ‘இல்லை’ என்றுதான் சொல்ல வேண்டியிருக்கிறது.

டிரைய்லர் கட்டில் இருந்த குறைந்த சுவாரசியம் கூட படத்தில் இல்லை. ‘கோர்ட் ரூம் டிராமா’ போல அறியப்பட்ட இந்தத் திரைப்படத்தை முழுமையாகப் பார்க்கும் போது ஸ்கூல் டிராமா போல இருக்கிறது.

இந்தத் திரைப்படம் சொல்ல வந்த ஆதாரமான செய்தி அவசியமானது என்றாலும் இழுவையான, அமெச்சூர் டிராமாவின் மூலம் இதன் காண்பனுபவத்தை மிக சலிப்பானதாக ஆக்கியிருக்கிறார் அறிமுக இயக்குநர் J. J. Fredrick.

**

ஊட்டியின் பின்னணியில் ஒரு அமைதியான, அழகான நிலப்பரப்போடு படம் துவங்குகிறது. சில துப்பாக்கித் தோட்டாக்கள் வெடிப்பதில் அந்த அமைதி கலைகிறது. ஜோதி என்கிற பெண், சைக்கோத்தனமாக குழந்தைகளைக் கடத்திக் கொல்வதாகவும், அப்படி அவர் ஒரு குழந்தையைக் கடத்திய போது தடுக்க வந்த இரு இளைஞர்களைச் சுட்டுக் கொன்று விட்டதாகவும் செய்திகள் பரபரப்பாக தெரிவிக்கின்றன. பிறகு நடந்த என்கவுண்ட்டரில் ஜோதியும் செத்து விடுகிறார்.

சுமார் 15 வருடங்களுக்குப் பிறகு ‘வெண்பா’ (ஜோதிகா) என்கிற வழக்கறிஞர் இந்த வழக்கைத் தூசு தட்டி எடுக்கிறார். ‘எங்கள் குழந்தைகளைக் கடத்திக் கொன்ற ஒரு பெண்ணுக்காகப் போய் வாதாடுகிறாயே” என்று ஊர் மக்கள் வெண்பாவைத் தூற்றுகிறார்கள்.

வெண்பாவின் முயற்சி வெற்றியடையாதவாறு சில நிழலான முயற்சிகள் நடக்கின்றன. பலவீனமான அரசு தரப்பு வழக்கறிஞர் மாற்றப்பட்டு, புகழ்பெற்ற, ஆனால் கிரிமினல்தனமான வழக்கறிஞரான ராஜரத்தினம் (பார்த்திபன்) வெண்பாவை எதிர்கொள்ள வருகிறார்.

யார் இந்த வெண்பா? எதற்காக அவர் 15 வருடங்கள் கழித்து இந்த வழக்கை நடத்த வேண்டும்? ஏன் அவருக்கு எதிரான முயற்சிகள் நடைபெறுகின்றன.

கோர்ட் டிராமா காட்சிகள் வழியாகவும் அதன் வெளியில் நடைபெறும் சம்பவங்களின் வழியாகவும் இதன் முடிச்சுகள் மெல்ல அவிழ்கின்றன.

**

பெண்மையத் திரைப்படங்களில் ‘ஜோதிகா’ நடிக்கிறார் என்றாலே உள்ளுக்குள் சற்று ‘கெதக்’ என்றுதான் ஆகி விடுகிறது. ராட்சசி போன்ற ஆறுதலான விதிவிலக்குகள் தவிர பலவற்றில் நம்மை பலமாக ஜோதித்திருக்கிறார் ஜோ. இதிலும் அந்த சோதனை தொடர்கிறது. ஆனால் இதற்காக ஜோதிகாவைக் குறை சொல்வதற்குப் பதிலாக அவரைச் சரியாக பயன்படுத்தாத இயக்குநர்களைத் தான் சுட்டிக் காட்ட வேண்டும்.

வெண்பாவாகவும் இன்னொரு பாத்திரத்திலும் நடித்திருக்கும் ஜோதிகா தன் பங்கையும் உழைப்பையும் இயன்ற அளவிற்கு தர முயன்றிருந்தாலும் பலவீனமான திரைக்கதை, நாடகத்தனமான காட்சிகள் போன்றவற்றால் பெரிதாக எந்தக் காட்சியும் சோபிக்கவில்லை.

பாக்யராஜ், பாண்டியராஜன், பார்த்திபன், பிரதாப் போத்தன் என்று அனுபவம் வாய்ந்த இயக்குநர்கள் கம் நடிகர்கள் இதில் இருக்கிறார்கள். ஆனால் எவருமே சரியாகப் பயன்படுத்தப்படவில்லை. துணை நடிகர்கள் போலவே வந்து போகிறார்கள். அநியாய விரயம்.

அதிலும் பாண்டியராஜனின் நிலைமை ரொம்பவும் மோசம். அவர் ஒரு காட்சியில் நீதிபதியின் உதவியாளர் போல இருக்கிறார். இன்னொரு காட்சியில் பார்வையாளர்களின் நடுவில் உட்கார்ந்திருக்கிறார்.

செல்வாக்கு மிக்க ஒருவரிடம் நீதிபதி பிரதாப் போத்தன் விலை போவது போல காண்பித்து விட்டு பிறகு மாற்றி விடுகிறார்கள். டிவிஸ்ட்டாம். இப்படி மொக்கைத்தனமான, எளிதில் யூகிக்க முடிகிற டிவிஸ்ட்கள் படம் பூராவும் வந்து நெளிய வைத்துக் கொண்டேயிருக்கின்றன. அதிலும் படம் ஏறத்தாழ முடிந்து நாம் கணினியை ஆஃப் செய்யலாம் என்று முடிவு செய்யும் போது கடைசியிலும் இயக்குநர் ஒரு டிவிஸ்ட் வைத்திருக்கிறார்.. பாருங்கள்.. முடியல.

**

ஒரு திரைப்படத்தில் casting மிக முக்கியம். கோயிஞ்சாமி போல இருக்கிற சுப்பு பஞ்சுவையெல்லாம் ஊழல் செய்கிற காவல் அதிகாரியாக கற்பனை செய்து பார்க்கமுடியவில்லை.

தியாகராஜனின் முகத்தில் பல நூற்றாண்டுகளாக எப்போதுமே எக்ஸ்பிரஷன் வராது. இதிலும் அப்படியே ரோபோத்தனமான வில்லத்தனத்தை செய்து விட்டுப் போகிறார்.

இந்த வரிசையில் ஆறுதலாக இருப்பவர் பார்த்திபன் மட்டுமே. அவருடைய பிரத்யேகமான பாணியில் ‘வெண்பா’ன்னு பேர் வெச்சுக்கிட்டு வெண்பா.. வெண்பா.. வா பேசிக்கிட்டே போறீங்க” என்று அவர் நக்கலடிக்கும் வசனங்கள் மட்டுமே சற்று புன்னகைக்க வைக்கிறது. அது கூட இயக்குநரைத் தாண்டி பார்த்திபனே சொல்லியதாக இருக்கக்கூடும்.

**
ஒளிப்பதிவு ராம்ஜி, எடிட்டிங் ரூபன் போன்று பலமான தொழில்நுட்பக் கலைஞர்களின் வரிசை இருந்தாலும் மொக்கையான திரைக்கதை காரணமாக படத்தைக் காப்பாற்ற முடியவில்லை.

படத்தின் பெரும்பாலான பின்னணி ஊட்டியில் நடப்பது போல் இருந்தாலும் பல காட்சிகளை சென்னையில் படமாக்கி மேட்ச் செய்ய முயன்றிருப்பார்கள் போலிருக்கிறது. ஒரு பாத்திரம் ஸ்வெட்டர் போட்டு வந்தால் அது ஊட்டி என்று நாம் நம்பியாக வேண்டும் போல.

படத்தின் ஆதாரமான கோர்ட் ரூம் காட்சிகளிலும் பெரிதாக எந்வொரு சுவாரசியமும் இல்லை. அதிலும் நீதிமன்றத்திலேயே ஒருவரையொருவர் ஏக வசனத்திலும் ‘நீதான்யா. ஃபிராடு.. நீதாண்டா கிரிமினல்’ என்றெல்லாம் பேசிக் கொள்ள முடியுமா என்று தெரியவில்லை. அதிலும் ஒரு பெண் நீதிபதியை ‘இல்ல மாமி.. நான் என்ன சொல்றேன்னா” என்கிறார் பாக்யராஜ். அரசு தரப்பு வழக்கறிஞரை ‘வாங்க நல்லாயிருக்கீங்களா.. காஃ.பியா கூல்டிரிங்ஸா.. என்ன சாப்பிடறீங்க?” என்று கேட்காத குறையாக வரவேற்கிறார் நீதிபதி பிரதாப் போத்தன்.

படத்தின் தயாரிப்பாளர் ஜோதிகாதான். அதற்காக இரண்டு முக்கிய பாத்திரங்களிலும் அவரையே நடிக்க வைத்திருக்க வேண்டுமா என்ன? அதைச் சமாளிப்பதற்காக இறுதியில் தந்திருக்கும் டிவிஸ்ட் சகிக்கவில்லை.



**

பெண் குழந்தைகளின் மீதான பாலியல் வன்முறைகளைப் பற்றி பேசுகிற இந்தத் திரைப்படம் சொல்கிற ஆதாரமான செய்தி முக்கியமானதுதான். ஆனால் செயற்கையான பல திருப்பங்களுடன் கொட்டாவி வரும் படி சொல்லியிருப்பதுதான் இந்தத் திரைப்படத்தை மிகச் சுமாரான முயற்சியாக ஆக்கியிருக்கிறது.

“மேடம்.. இந்தப் படத்துல நீங்கதான் சென்ட்டர் ஆஃப் அட்ராக்ஷன். படமே உங்களை வெச்சுதான் ஒடுது” என்று ஜோதிகாவிடம் இனி எந்தவொரு இயக்குநராவது கதை சொல்ல வந்தால் சூர்யாவின் குடும்பம் உஷாராகி விடுவது நல்லது. ஆம். இந்தத் திரைப்படம் ‘சூர்யா –ஜோதிகா’ தயாரிப்பு.

‘பொன்மகள் வந்தாள்’ – ‘வாடி ராசாத்தி’ என்று சொல்லி வரவேற்க வேண்டியதை ‘ஏம்மா வந்து இம்சை பண்றே’ என்று சலிப்போடு சொல்ல வைத்திருக்கிறார்கள்.



suresh kannan

The Intern (2015) - ‘அனுபவம் எனும் அற்புதம்'




பழங்கால கடிகாரத்தை உடைத்து விட்டு "பழசா...நான் கூட புதுசோன்னு பயந்துட்டேன்" என்பார் வடிவேலு ஒரு நகைச்சுவைக் காட்சியில். அவரைப் போலவே நமக்கும் பெரும்பாலான சமயங்களில் பழமையின் அருமை தெரிவதில்லை.

இதைப் போலவே வயதானவர்களின் அருமையும் நமக்குப் புரிவதில்லை. 'பெரிசு' 'ஒரே நச்சு' என்று சில வார்த்தைகளில் அவர்களை நிராகரித்து விடுகிறோம். அனுபவம் என்பது உடனே  கிடைத்து விடாத விலைமதிப்பில்லாத சொத்து. பல வருடங்களைக் கடந்த பிறகுதான் அந்தச் சொத்து கிடைக்கும். அம்மாதிரியான ஓர் அனுபவசாலி பெரியவரின் அருமையைச் சொல்லும் திரைப்படம் இது.

**

நியூயார்க்கில் வசிக்கும் பென் எழுபது வயது முதியவர். மனைவியை இழந்தவர். சுறுசுறுப்பாக இருந்து பழகியவர். பணியிலிருந்து ஓய்வு பெற்ற பின் பல்வேறு வழிகளில் பிஸியாக இருக்க முயல்கிறார். ஆனால் எல்லாமே போரடிக்கிறது. வயதான காலத்தில் வேலைக்கு விண்ணப்பிக்கிறார். அங்கு பணிபுரியும் எல்லோருமே பரபரப்பான இளைஞர்கள். நவீன உலகத்தின் அடையாளங்கள். பென் வயதால் பழமையானவராக இருந்தாலும் மனதால் இளையவர். எனவே நவீன விஷயங்களை உடனே கிரகித்துக் கொள்ளும் மனோபாவம்  உள்ளவராக இருக்கிறார். அவருடைய அனுபவம் மற்றும் இனிமையான சுபாவம் காரணமாக அலுவலகத்திலுள்ள பெரும்பாலோனோருக்கு அவரை பிடித்துப் போகிறது.

ஆனால் அதன் நிறுவனரான ஜூல்ஸிற்கு கிழவரைப் பிடிக்கவில்லை. பென் என்றல்ல, வயதானவர்கள் என்றாலே அவளுக்குப் பிடிக்காது, ஒரு நொடி நிற்க கூட நேரமில்லாமல் ஓடிக் கொண்டேயிருக்கும் சமகால இளைய தலைமுறையின் சரியான பிரதிநிதி ஜுல்ஸ். பேசுவது கூட தனியார் எப்.ஃஎம் –மின் நிகழ்ச்சி தொகுப்பாளர்கள் போல அத்தனை வேகம்.

எனவே அவளுடைய வேகத்தை மட்டுப்படுத்துவதற்காக கம்பெனியின் பார்ட்னர் ஓர் உபாயம் செய்கிறார். நமது எழுபது வயது ஹீரோவான பென்னை அவளுக்கு உதவியாளராக நியமிக்கிறார். “என்னது, இந்தப் பெரிசு எனக்கு உதவியா, என்ன விளையாடறியா?’ என்று எரிச்சலாகும் ஜுல்ஸ், வேறு வழியில்லாமல் ஏற்றுக் கொள்கிறாள்.

ஒருபக்கம் ராக்கெட் வேகத்தில் பறக்கும் இளம்பெண். இன்னொரு பக்கம் கூட்ஸ் வண்டி மாதிரி ஆனால் அறிவுபூர்வமான நிதானத்துடன் நகரும் கிழவர். இந்த சுவாரசியமான முரணால் நிறைய நல்ல விஷயங்கள் நடக்கின்றன. ஜூல்ஸிற்கு அவசியம் தேவையான ஒரு ஸ்பீட் பிரேக்கரைப் போல அமைகிறார் பென்.

**

ஜூல்ஸிற்கு  உதவியாளர் பணி என்றாலும் அனைத்து வேலைகளையும் இழுத்துப் போட்டுச் செய்கிறார் கிழவர். சமயங்களில் தன் அனுபவத்தின் மூலம் அவர் தரும் ஐடியாக்கள் கம்பெனிக்கு உபயோகமாக இருக்கின்றன. ஜூல்ஸிற்கு கிழவரை மெல்ல பிடித்துப் போக ஆரம்பிக்கிறது. ஆனால் தன்னுடைய விஷயத்தில் நிறைய மூக்கை நுழைக்கிறாரோ என்கிற நெருடலும் ஏற்படுகிறது.

ஆனால் ஒரு கட்டத்தில் பென் இல்லாமல் ஜூல்ஸ் நிம்மதியாக அவளுடைய பணியைச் செய்ய முடியாது என்கிற நிலை ஏற்படுகிறது. அலுவலக விஷயத்திலும் மட்டுமல்லாமல் ஜூல்ஸின் தனிப்பட்ட பணிகளிலும் கெளவரம் பார்க்காமல் உதவுகிறார் பென். ஜூல்ஸின் குழந்தையை வெளியே அழைத்துச் செல்கிறார். டிரைவர் வேலையைப் பார்க்கிறார்.

**
ஜூல்ஸ் மனதில் ஒரு பிரச்சினை ஓடிக் கொண்டிருக்கிறது. அவளே எல்லா வேலைகளையும் பரபரப்பாக செய்வதால் சமயங்களில் குழப்பம் ஏற்படுகிறது. எனவே கம்பெனிக்கு ஒரு CEO தேவை என்கிறார் பார்ட்னர். ஆனால் தன்னுடைய கடுமையான உழைப்பில் உருவான நிறுவனத்தின் தலைமைப் பொறுப்பை இன்னொருவரிடம் தர வேண்டுமா என குழம்புகிறாள் ஜூல்ஸ். அதே சமயத்தில் அதை செய்யாமலும் இருக்க முடியாது.

இதே சமயத்தில் இன்னொரு பிரச்சினையும் கிளம்புகிறது. ஜூல்ஸின் கணவனுக்கு வேறொரு பெண்ணுடன் தொடர்பிருக்கும் விஷயம் தெரிய வருகிறது. ‘எப்போது பார்த்தாலும் கம்பெனி விஷயமாக சுற்றிக் கொண்டிருந்தால் என்ன ஆகும்?’ அவளுடைய கணவன் தனக்காக வேறொரு ‘கம்பெனி’யைத் தேடிக் கொள்கிறான்.

**

உடைந்து போகும் ஜூல்ஸிற்கு ஆபத்பாந்தவனாக வருகிறார் பென். ஏறத்தாழ ஒரு தந்தையின் நிலையில் இருந்து அவளுக்கு யோசனை தருகிறார். ‘நன்றாக யோசி பெண்ணே.. உன் உழைப்பில், யோசனையில் உருவான நிறுவனத்தில் ஓர் அந்நியரை தலையிட விடலாமா?. உன் பணியாளர்கள் அருமையானவர்கள். வேலையைப் பகிர்ந்தளித்து விட்டு உன் சுமையைக் குறைத்து குடும்பத்தையும் சற்று கவனி. எல்லாம் சரியாகும்” என்கிறார்.

அவர் சொல்லியபடியே எல்லாம் சுபமாகிறது. ரிலாக்ஸ் ஆக உடற்பயிற்சி செய்யும் பென்னுடன் ஜூல்ஸூம் இணைந்து கொள்ளும் காட்சியுடன் படம் நிறைவடைகிறது. உதவியாளராக வந்து இணையும் பென், ஜூல்ஸ்ஸிற்கு உபாத்தியாயரான கதை இது.

**

கிழவர் பென்னாக அட்டகாசம் செய்திருக்கிறார் ராபர்ட் டி நீரோ. இத்தனை அனுபவம் வாய்ந்த நடிகர் இப்படியாரு பாத்திரத்தில் கெளரவம் பார்க்காமல் நடிக்க முன்வருவது தமிழில் நடப்பது சந்தேகமே. போலவே ஜூல்ஸ் ஆக நடித்த அன்னா ஹாத்அவேயின் நடிப்பும் அபாரம்‘ அனுபவத்திற்கு ஓய்வு கிடையாது’ எனும் அழுத்தமான கருத்தை வெளிப்படுத்தும் விதத்தில் அருமையானதொரு திரைப்படமாக இயக்கியிருக்கிறார் நான்சி மேயர்ஸ்.

(குமுதம் சினிமா தொடரில் பிரசுரமானது)


suresh kannan

Thursday, May 28, 2020

Our Kind of Traitor (2016) - ‘கறுப்பு பண துரோகிகள்'




நம்முடைய சாதாரண உப்புமா வாழ்க்கையைத் தாண்டி நம்மைச் சுற்றி பல நிழலான காரியங்கள் நிகழ்ந்து கொண்டிருப்பதை  நம்மால் உணர முடியாது. சர்வதேச குற்றத்தின் ஒரு சிறுஅசைவு நம் காலடியில் நடந்து கொண்டிருக்கலாம். கற்பனை செய்து கூட பார்க்க முடியாத குற்றங்களின் பனிக்கட்டி முனை. கோடிக்கணக்கான நிதி மோசடிகள், பின்னேயுள்ள பண முதலைகள், வெடிக்கும் துப்பாக்கிகள், செய்யப்படும் துரோகங்கள், கண்காணிக்கும் நிறுவனங்கள் என்று ஒரு வனத்தில் நிகழும் இரக்கமற்ற வேட்டைகள்  மெளனமாக நிகழ்ந்து கொண்டிருக்கும்.

'அது சரிய்யா.. இதையெல்லாம் எங்ககிட்ட ஏன் சொல்றே.. நாங்க ஏன் நடுராத்திரில சுடுகாட்டுக்குப் போகப் போறோம்?' என்று நீீங்கள் முனகுவது கேட்கிறது.  குற்றச் செயல்களின் மூலம் கிடைத்த பெரும்பணத்தை ஒரு ரஷ்ய மாஃபியா கும்பல், லண்டனுக்கு அனுப்பி  வெள்ளையாக்கும் சதி நடவடிக்கையின் இடையே ஒரு சாதாரண குடும்பம் தற்செயலாக மாட்டினால் என்னவாகும்?


***

கவிதைப் பேராசிரியரான பெரி லண்டனில் வசிப்பவர். மனைவி ஒரு வழக்கறிஞர். தங்களுக்குள் ஏற்பட்ட  சிறு மனஸ்தாபத்தை களைவதற்காக இருவரும் மொராக்கோவிற்கு செல்கின்றனர்.  பணக்கார ஹோட்டலில் டிமா என்கிற நடுத்தர வயது ஆசாமியை தற்செயலாக சந்திக்கிறான் பெரி. இருவரும் நண்பர்களாகின்றனர். தன் மகளின் பிறந்தநாள் விழாவிற்கு அழைக்கிறார் டிமா. சற்று தயக்கம் இருந்தாலும் 'ஒரு பெரிய மனுஷன் இத்தனை மதிச்சு அழைக்கிறானே' என்று செல்கிறான். அங்குதான் ஏழரை நாட்டுச் சனி ஆவேசமான பிரியத்துடன் பெரியை தழுவிக் கொள்கிறது.

டிமா ரஷ்ய மாஃபியா ஆசாமி. பெரிய பணமுதலை ஒன்றின் கணக்குப் பிள்ளை. பாவத்தில்  வந்த ரத்தப் பணத்தை வெள்ளையாக்குவது இவருடைய பணி. பெரிய முதலாளி இறந்தவுடன் சின்ன முதலாளி பதவிற்கு வருகிறார். ஈவு, இரக்கம் ஏதுமில்லாதவர். டிமாவைப்  போன்ற இன்னொரு ஆசாமியிடமிருந்து எல்லாவற்றையும் கறந்தவுடன் குடும்பத்தைச் சுட்டுக் கொள்கிறாா். அந்தக் குடும்பத்தின் மிச்சமிருக்கும் மூன்று மகள்கள் இப்போது டிமாவின் பாதுகாப்பில்.

இப்போது டிமாவிற்கும் அதே ஆபத்து ஒரு கத்தி போல தலைக்கு மேலே தொங்கிக் கொண்டிருக்கிறது. அவரும் தன்னிடமுள்ள கணக்குகளை சின்ன முதலாளியிடம் ஒப்படைத்த பின்னர் கூண்டோடு கைலாசத்திற்கு அனுப்பப்படுவார். டிமாவைச் சுற்றி  சின்ன முதலாளியின் ஆட்கள். ஒவ்வொரு அசைவையும் கண்காணிக்கின்றனர். அவர்களுக்கு தண்ணி காட்டி விட்டு பெரியைச் சந்திக்கிறார் டிமா.

தன் ஆபத்தை விளக்கி 'இந்த  மெமரி கார்டை' லண்டன் உளவுத்துறையிடம் தந்து விடு. அவர்களுக்கு புரியும். அந்தக் குழந்தைகளின் வாழ்க்கையோடு என் குடும்பத்தின் கதியும் உன் கையில்தான் இருக்கிறது. இங்கு வேறு யாரையும் நான் நம்ப முடியாது' என்கிறார்.  பெரிக்கு  இந்த ஆபத்தில் சிக்க விருப்பமில்லை என்றாலும் டிமாவின் நல்ல இயல்பிற்காக  சம்மதிக்கிறார்.

பூனை எலி ஆட்டம் ஆரம்பிக்கிறது.

***

பிரிட்டிஷ் உளவுத்துறையுடன் பேச்சு வார்த்தை நடக்கிறது. 'என்னுடைய குடும்பத்தை பாதுகாப்புடன் லண்டனுக்கு அழைத்து வருவதாக உத்தரவாதம் தந்தால்  சில வங்கி எண்களைச் சொல்வேன்' என்கிறார் டிமா. உளவுத்துறை அதிகாரியான பெக்கர் யோசிக்கிறார். அவருடைய முன்னாள் பாஸூக்கும் கூட இந்த சதியில் பங்கிருக்கிறது. நாட்டின் பொருளாதாரம் சீரழிவதைப் பற்றி கவலைப்படாத சுயநலமி ஆசாமி. இந்தக் கூட்டத்தை எப்படியாவது அம்பலப்படுத்த வேண்டும் என பெக்கருக்கு தோன்றுகிறது.

கணக்குகளை ஒப்படைப்பதற்காக டிமாவை அழைக்கிறார் சின்ன முதலாளி. அந்த விஷயம் முடிந்ததும் குடும்பத்தோடு காலி என டிமாவிற்கு தெரியும். ஆனால் உளவுத்துறை எப்படியோ அவர்களைக் காப்பாற்றி விடுகிறது. தனியான சாகசம் மூலமாக டிமாவை பெரி காப்பாற்றுகிறான். ஆனால் இவர்கள் ஊரை விட்டை தப்பிக்க முடியாதவாறு ஒரு முட்டுக்கட்டை வருகிறது. வேறு யார்? பெக்கரின் முன்னால் பாஸ். இப்போது அரசியல்வாதியாக இருப்பதால் தன் அதிகாரத்தை உபயோகிக்கிறார்.

எனவே டிமாவின் குடும்பத்தை  ரகசிய இடத்திற்கு அனுப்புகிறார் பெக்கர். பெரியின் குடும்பமும் உடன் செல்கிறது. "நீ நம்பகத்தன்மையான ஆள்' என்று பெரியைப் பாராட்டுகிறார் டிமா. இருவருக்கும் உள்ள நெருக்கம் கூடுகிறது.

***

லண்டனுக்கு திரும்பும் பெக்கர் உயர்அதிகாரிகளிடம் கறுப்பு நிதியை வெள்ளையாக்கும் இந்த மகா சதியைப் பற்றி சொல்கிறார். இதனுடன் தொடர்புள்ள பண முதலைகளின் மீது நடவடிக்கை எடுக்க அனுமதி வாங்குகிறார். "ஆனால் இதற்கு ஆதாரம் தேவை. டிமா வங்கி எண்கள் பற்றிய விவரங்களைத் தருவாரா? தந்தால் அவருக்கு அடைக்கலம் தரலாம்" என்கிறாார்கள்.

பேச்சுவார்த்தைக்காக டிமாவை வரச் சொல்லி தகவல் வருகிறது. கூட பெரியும் வருவதாகச் சொல்கிறான். ஆனால் உள்ளுணர்வில் ஏதோ நெருட  கடைசி நிமிடத்தில் அவனை வர வேண்டாம் என சொல்கிறார் டிமா. அவர் யூகித்தபடியே பயணிக்கும் ஹெலிகாப்டர் வெடித்துச் சிதறுகிறது.

எல்லாத்திட்டமும் ஃபணால் ஆகிறது. எதிரிகள் கொண்டாட்டமாகிறார்கள். பெக்கர் தன் செல்வாக்கைப் பயன்படுத்தி டிமாவின் குடும்பத்தை லண்டனுக்கு வரவழைக்கிறார்.

பெரி கடைசி முறையாக பெக்கரை பார்க்க வருகிறான். 'டிமா இதை கொடுக்கச் சொனார்' என்று ஒரு பெட்டியைத் தருகிறான். உள்ளே ஒரு காலி துப்பாக்கி. பெக்கருக்கு ஒன்றும் புரியவில்லை. சற்று நேரம் யோசித்து விட்டு துப்பாக்கியை அழுத்துகிறார். உள்ளே வங்கி எண்கள் வரிசையாக எழுதப்பட்டுள்ள ஒரு துண்டு பேப்பர் சுருளாக கிடக்கிறது.

***

புத்திசாலித்தனமான உரையாடல்களும் சாகசக் காட்சிகளும் நிறைந்துள்ள படம். பெரி, டிமா, பெக்கர் ஆகியவர்களின் நடிப்பு அபாரம். பெரி இந்தச் சிக்கலில் இறங்கும் போது நமக்கே அத்தனை பதட்டம் வருகிறது. ஒரு புத்திசாலித்தனமான திரில்லருக்கான இலக்கணத்துடன் இயக்கியிருக்கிறார் Susanna White.



(குமுதம் சினிமா தொடரில் பிரசுரமானது)



suresh kannan

Wednesday, May 27, 2020

Chef (2014) - ‘கையேந்தி பவன்'





உலகத்திலுள்ள தொழில்களுள் மிகச் சிறப்பானதொன்று சமையல். இது ஒரு கலையும் கூட. மனிதனின் ஆதாரமான உணர்ச்சிகளுள் ஒன்றான பசியைப் போக்குவது. 'ஒருவரின் வயிற்றின் வழியாக அவரது இதயத்திற்கு செல்ல முடியும்' என்கிறது ஒரு பழமொழி. தம்முடைய தொழிலில் அர்ப்பணிப்புடனும்  ஆத்மார்த்தமான ஆர்வத்துடனும் ஈடுபடும் ஒரு சமையல் கலைஞனைப் பற்றிய அமெரிக்கத் திரைப்படம் இது. உணர்வுபூர்வமான அதே சமயத்தில் ஜாலியான படமும் கூட.


***

கலிபோர்னியா நகரத்திலுள்ள ஒரு பிரபல உணவகத்தின் தலைமைச் சமையற்காரர் கார்ல் கேஸ்பர். அன்றைய நாள் அவருக்கு பரபரப்பாக விடிகிறது. ஆம். உணவுகளைப் பற்றி எழுதும் பிரபல விமர்சகர் ராம்சே மிச்சல்  என்பவர் கார்ல் பணிபுரியும் உணவகத்திற்கு அன்று மாலை வரப்போகிறார். அவரது எழுத்துக்கு பலநூறு வாசகர்கள் உண்டு. எனவே தனது சமையல் திறனின் மூலம் விமர்சகரை எப்படியாவது கவர்ந்து விட வேண்டும் என்று கார்லுக்கு பயங்கர ஆர்வம் தோன்றுகிறது. தனது சகாக்களை அதற்கு தயார்ப்படுத்துகிறார். வித்தியாசமான உணவு வகைகளின் மூலம் ராம்சேவை அசத்தி விடவேண்டும் என்பதற்காக ஏற்பாடுகள் பரபரப்பாக நடக்கின்றன.

ஆனால் உணவகத்தின் உரிமையாளர் அதற்கு முட்டுக்கட்டை போடுகிறார். "தோ.. பாருப்பா.. நீ திறமையான செஃப்தான். ஒத்துக்கறேன். ஆனா உன் இஷ்டத்திற்கு மெனுவை மாத்தாதே. இது பிஸ்னஸ். இவங்களுக்கெல்லாம் நான்தான் சம்பளம் தர்றேன்" . கடுப்பாகும் கார்ல், வேறு வழியில்லாமல் வழக்கமான மெனுவை ஆனால் சிறப்பாக தயார் செய்கிறார்.


எல்லாம் முடிந்து விமர்சகரின் அபிப்ராயத்தை அவரது இணைய தளத்தில் படிக்கும் கார்லுக்கு டென்ஷன் ஏறுகிறது. கார்லின் சமையலைப் பற்றி கடுமையாக விமர்சித்து எழுதியிருக்கிறார் ராம்சே. அது மட்டுமல்ல. "வாடிக்கையாளர் திருப்பியனுப்பும் உணவையெல்லாம் கார்ல் தின்று விடுகிறார் போல" என்று  கார்லின் குண்டான உடம்பைப் பற்றியும் தனிப்பட்ட வகையில் விமர்சித்திருக்கிறார்.

***


இந்த விஷயம் இணையத்தில் காட்டுத் தீயாக பரவுகிறது. கார்லை  பலர் திட்டுகிறார்கள். சிலர் ஆதரவாக எழுதுகிறார்கள். 'டிவிட்டர்' என்கிற தளத்தில் அவரைப் பற்றிய நிறைய ஆபாச விமர்சனங்கள் இருப்பதை கார்லின் நண்பர்கள் சொல்கிறார்கள். இணையம் பற்றி கார்லுக்கு அதிகம் தெரியாது. எனவே தனது பத்து வயது மகனின் உதவியின் மூலம் டிவிட்டரில் உறுப்பினராகி தன்னைப் பற்றிய வசைகளை வாசிக்கிறார். மெல்ல மெல்ல அவருக்குள் சூடேறுகிறது.

தனிப்பட்ட முறையில் அனுப்புவதாக நினைத்துக் கொண்டு அவர்  விமர்சகருக்கு அனுப்பும் ஒரு செய்தி பொதுவில் சென்று சண்டையாக மாறுகிறது. 'இந்த முறை வந்து சாப்பிட்டு எழுது பார்க்கலாம்' என்று டிவிட்டரில் விமர்சகரை சவாலுக்கு அழைக்கிறார். மறுபடியும் பரபரப்பான ஏற்பாடுகள். தம்முடைய திறமையையெல்லாம் கொட்டி உணவு வகைகளை திட்டமிடுகிறார். ஆனால் மறுபடியும் உணவக உரிமையாளரிடமிருந்து முட்டுக்கட்டை. 'இங்க வியாபாரம்தான் முக்கியம். உன்னோட சவால், கலையார்வம் இதையெல்லாம் தூக்கி வெளியே போடு' என்கிறார். இருவருக்கும் வாக்குவாதம் முற்ற கார்ல் தனது பணியை தூக்கியெறிந்து விட்டு போகிறார்.

சவாலை எதிர்கொண்டு அன்று மாலை வரும் விமர்சகர், அதே வழக்கமான உணவு இருப்பதைப் பார்த்து விட்டு மறுபடியும் வெறுப்பேற்றுவது போல் ஒரு குறிப்பை இணையத்தில் எழுத, இதைக் கேள்விப்படும் கார்ல் உணவகத்திற்கு நேராக வந்து விமர்சகரை சரமாரியாக திட்டுகிறார். "நாங்க எவ்ள கஷ்டப்பட்டு இதையெல்லாம் தயார் செய்யறோம்னு உனக்குத் தெரியுமா?". அங்கிருப்பவர்கள் இதை வீடியோவில் பதிவு செய்து இணையத்தில் வெளியிட கார்ல் பலராலும் நகைச்சுவையாக பார்க்கப்படுகிறார். அவரது புகழ் மங்கத் துவங்குகிறது.


***

அடுத்து என்ன செய்வது என்று திகைத்து நிற்கும் கார்லை அவரது முன்னாள் மனைவி, அவரது பிறந்த ஊரான மியாமி-க்கு அழைக்கிறார். இவர்களது மகனுடன் செல்வதென ஏற்பாடு. மியாமி செல்லும் கார்லுக்கு புதிய வெளிச்சம் கிடைக்கிறது. அங்கு கிடைக்கும் உதவியின் மூலம் ஒரு பழைய டிரக்கை புதிதாக்குகிறார். ஊர் ஊராக நகர்ந்து செல்லும் 'கையேந்தி பவன்'  ஒன்று தொடங்குவது என திட்டம். மகனும் இவருக்கு உதவுகிறான்.  கார்லின் பழைய சகா ஒருவனும் வந்து இணைகிறான்.

தன்னை தடைசெய்வதற்கு ஆள் யாரும் இல்லாமல் தன் சுயவிருப்பத்திற்கு ஏற்ப க்யூபாவின் பாரம்பரியமான உணவுகளை தயார் செய்கிறார். கூட்டம் வந்து அள்ளிக் கொள்கிறது. கார்லின் மகன் இதை புகைப்படமாகவும் வீடியோவாகவும் இணையத்தில் போட இவரது புகழ் பரவி அடுத்த ஊருக்கு இவர்கள் செல்லும் முன்னரே அங்கு கூட்டம் காத்துக் கிடக்கிறது. 'கற்றோர்க்கு செல்லுமிடமெல்லாம் சிறப்பு' என்பது போல கார்ல் செல்லுமிடமெல்லாம் இவரது உணவிற்கு வரவேற்பு கிடைக்கிறது.

கார்லைப் பற்றி மட்டமாக எழுதிய விமர்சகரே இவரது உணவைத் தேடி வந்து சாப்பிட்டு பாராட்டுகிறார். "இப்பதான் மச்சி சூப்பர். உன் விருப்பத்திற்கு செஞ்சா எவ்ள நல்லா வருது பார்த்தியா. சரி. நான் பணம் போடறேன். ஹோட்டல் ஆரம்பிக்கலாமா?'' என்கிறார். புது ஹோட்டலில் தன் முன்னாள் மனைவியுடன் கார்ல் மீண்டும் இணையும் ஒரு கொண்டாட்டத்துடன் படம் நிறைகிறது.

***

கார்ல் ஆக அட்டகாசமாக நடித்து படத்தையும் இயக்கியிருப்பவர் Jon Favreau. இவரது மகனாக நடித்திருக்கும் எம்ஜே ஆந்தனியின் நடிப்பும் அபாரம். உணவு தயாராகும் காட்சிகள், நம் நாக்கில் நீர் ஊற வைக்கும் வகையில் அற்புதமாக படமாக்கப்பட்டிருக்கின்றன. 'சற்று தீய்ந்து போகும் உணவை மற்றவருக்கு ஏன் தரக்கூடாது' என கேட்கும் மகனிடம் ஒரு சமையற்காரராக அதன் பொறுப்புணர்வைப் பற்றி கார்ல் விளக்கும் இடம் சிறப்பானது.


உணவு என்பது அதன் சேர்மானங்களாலும் திறமைகளாலும் அல்ல, சமைப்பவரின் ஆன்மாவும் இணையும் போதுதான் சிறப்பானதாகிறது என்கிற கருத்தை அழுத்தமாகச் சொல்லும் திரைப்படம் இது.


(குமுதம் சினிமா தொடரில் பிரசுரமானது)

suresh kannan

Tuesday, May 26, 2020

Sully (2016) - ‘சல்லி’யின் சாகசம்





உங்கள் பணியிடத்தில் ஓர் அசாதாரணமான சிக்கல் நேர்கிறது என வைத்துக் கொள்வோம். அதை நீக்குவதற்காக பதட்டத்துடன் நேரம் காலம் பார்க்காமல் உழைக்கிறீர்கள். வெற்றிகரமாக அதை முடித்து விட்டு அந்தரங்கமாக அதன் திருப்தியை கர்வமாக உணர்கிறீர்கள். இதற்காக உங்கள் பாஸிடமிருந்து பாராட்டும் அங்கீகாரமும் கிடைப்பதற்குப் பதிலாக வேறொரு காரணத்திற்காக திட்டும் தண்டனையும் கிடைக்கிறது என்றால் என்ன செய்வீர்கள்?

ஒவ்வொரு பணியாளரும் எதிர்கொள்ள நேரும் பரிதாபகரமான சூழல் இது. விமான பைலட்டாக  42 ஆண்டுகளை ஒரு சிக்கலும் இல்லாமல் வெற்றிகரமாக கழித்த சாலி, தனது பணியின் இறுதிக்காலத்தில் இப்படியொரு சூழலை எதிர்கொள்ள நேர்கிறது. அது என்ன சிக்கல்? என்னவாகிறது அவருக்கு?

**
நியூயார்க் நகரத்திலுள்ள லாகார்டியா விமானநிலையத்திலிருந்து தனது சவாரியை துவக்குகிறார் சல்லி. விமானம் டேக் ஆஃப் ஆகிய மூன்றாவது நிமிடத்தில் பறவைகள் சரமாரியாக வந்து மோதுவதால் இஞ்சின்கள் பழுதாகின்றன. பதட்டமான சூழல். விமானத்தில் 155 பயணிகள் இருக்கிறார்கள். அவர்களுக்கு எந்தவொரு ஆபத்தும் வரக்கூடாது.

சாலி தன்னுடைய நீண்ட அனுபவத்தின் மூலம் உதவியாளரோடு அந்தச் சிக்கலை நிதானமாக கையாள்கிறார். கட்டுப்பாட்டு மையத்தை அழைத்து நிலைமையின் விபரீதத்தை சொல்கிறார். ‘ஒன்று கிளம்பிய இடத்திற்கு திரும்பவும் அல்லது அருகிலிருக்கும் ஒரு விமானநிலையத்தில் தரையிறக்கவும்’ என்று அங்கிருந்து பதில் வருகிறது.

சல்லியின் அனுபவ மூளை அவசரம் அவசரமாக சில கணக்குகளைப் போடுகிறது. ம்.ஹூம்.. அவர்கள் குறிப்பிடும் இடத்திற்குச் செல்ல நேரமில்லை. சட்டென்று முடிவெடுத்து விமானத்தை ‘ஹட்ஸன்’ ஆற்றுக்குள் இறக்குகிறார். கட்டுப்பாட்டு மையத்தில் இந்த தகவலை நம்ப முடியாமல் அதிர்ச்சியில் உறைகிறார்கள். ஏனெனில் இதுவரை நீரில் தரையிறக்கப்பட்ட எந்தவொரு விமானமும் பிழைத்ததில்லை.

ஆனால் சாலி அதைச் சாதிக்கிறார். மிக மிக நிதானமாக வேகத்தைக் குறைத்து ஆற்றின் மீது இறக்குகிறார். பதட்டப்படும் பயணிகளை தைரியப்படுத்தி வெளியே பத்திரமாக போகும் குறிப்புகளை சொல்கிறார். அருகில் செல்லும் சிறிய கப்பல் ஒன்று இவர்களைின் தவிப்பை பார்த்து விட்டு உதவிக்காக வருகிறது.

விமானம் ஆற்றில் இறங்கிய செய்தி கட்டுப்பாட்டு அறைக்குள் தீப்பற்றியது போல சூழலை ஏற்படுத்துகிறது. அங்கிருந்து தகவல்கள் பறக்கின்றன. மேலும் சில கப்பல்கள் வருகின்றன. விமானத்தில் இருக்கும் அனைவரும் வெளியேறி விட்டார்களா என்பதை உறுதி செய்த பிறகே சாலி விமானத்திலிருந்து வெளியே வருகிறார். ஒரு காப்டனின் அடிப்படையான தியாகவுணர்வு இது.

**

சாலியை ஊரே கதாநாயகனாக கொண்டாடுகிறது. ஊடகங்கள் பரபரப்பாக இந்த நிகழ்வை ஒளிபரப்புகின்றன. உயிர் தப்பிய பயணிகள் தங்களின் அதிர்ஷ்டத்தை நம்ப முடியாமல் அழுது கதறுகிறார்கள்.

அப்போது கூட சாலிக்கு 155 நபர்களும் உயிர்தப்பி விட்டார்களா என்கிற எண்ணமே ஓடிக் கொண்டிருக்கிறது. ‘அதை உறுதிப்படுத்துங்கள்’ என்கிறார். “நீ செஞ்சது பெரிய விஷயம். போய் ரெஸ்ட் எடு தல.. இனி நாங்க பார்த்துக்கறோம்’ என்கிறார்கள் சக ஊழியர்கள்.

இப்படி ஒரு புறம் மக்களும் ஊடகங்களும் சாலியை ‘ஹீரோவாக’ கொண்டாடிக் கொண்டிருக்கும் போது மறுபறம் அவருக்கொரு பெரிய ஆப்பு காத்துக் கொண்டிருக்கிறது.

ஆம். தேசிய போக்குவரத்து பாதுகாப்பு குழு அவர் மீது விசாரணையை துவக்குகிறது. ‘அருகிலிருக்கும் விமான நிலையத்தில் போய் ஈசியா தரையிறங்கியிருக்கலாம். உன்னை எவன்யா போய் கப்பல் மாதிரி தண்ணில இறக்கச் சொன்னது?” என்று கடுப்பேற்றுகிறார்கள். சல்லியின் இந்த அபாரமான சாசத்தை 'சல்லி'த்தனமானது என்கிறார்கள்.
**

விமானத்தை ஒருமாதிரியாக பத்திரமாக தரையிறக்கி விட்டாலும் சாலிக்கு அது சார்ந்த உளவியல் பாதிப்பு இருக்கிறது. விமானம் கட்டிடத்தில் மோதிச் சிதறும் காட்சி மனதிற்குள் வந்து தூக்கத்திலிருந்து பதறி எழுந்து கொள்கிறார். விசாரணை முடியும் வரை வேறு நகரத்திலிருக்கும் தனது அவர் வீட்டிற்கும் செல்ல முடியவில்லை. மனைவி வேறு போன் செய்து “நீங்க ஹீரோதான். சரி. ஆனா பாவி மனுஷா.. பால் கார்டு வாங்க கூட காசில்லாம நான் அவஸ்தைப்படறத யார் கிட்ட சொல்றது?” என்கிற மாதிரி புலம்புகிறார்.

சாலிக்கு இந்த அவஸ்தைகளின் நடுவே விசாரணை தொல்லை வேறு. ‘கணினி உதவியுடன் அந்த சிக்கலான சூழலை செயற்கையாக உருவாக்கி நாங்கள் பல மாதிரியாக சோதனை செய்து பார்த்து விட்டோம். எப்படியும் ஒரு இன்ஜின் பழுதில்லாமல் இருந்திருக்கும். நீங்கள் பக்கத்திலிருக்கும் விமானநிலையத்தில் பத்திரமாக தரையிறக்கியிருக்கலாம்” என்று சாதிக்கிறார்கள்.

“என்ன சோதனையாக இருந்தாலும் நீங்கள் செய்தது செயற்கையானது. அந்தச் சிக்கலான சமயத்தில், 155 பயணிகளின் உயிர் மதிப்பை கணக்கில் எடுத்துக் கொண்டு மனிதனாக சிந்தித்திருக்கிறேன். இயந்திரங்களால் அது முடியாது” என்று வாதிடுகிறார் சாலி. இறுதி ரிப்போர்ட்டின் படி சாலி செய்தது சரி என்பது நிரூபணம் ஆகிறது.

**

Chesley Sullenberger  என்கிற விமான பைலட்டுக்கு நிகழ்ந்த உண்மைச் சம்பவத்தின் அடிப்படையில் இந்த திரைப்படம் உருவாக்கப்பட்டுள்ளது. சாலியாக டாம் ஹாங்ஸ் அட்டகாசப்படுத்தியுள்ளார். மிக மிக இயல்பான நடிப்பு. விமானம் ஆற்றில் இறங்கும் காட்சிகளும் பயணிகள் மீட்கப்படும் காட்சிகளும் அவற்றின் பதட்டத்தை நாம் உணருமாறு அருமையாக காட்சிப்படுத்தப்பட்டுள்ளன. படத்தை இயக்கியவர் 86 வயது இளைஞர் கிளின்ட் ஈஸ்ட்வுட்.

இயந்திரங்கள் எத்தனை மேம்படுத்தப்பட்டாலும் அவைகளால் மனித உணர்வுகளுக்கு இணையாக சிந்திக்க முடியாது என்கிற ஆதாரமான கருத்தை அழுத்தமாக பதிவு செய்கிறது இந்த திரைப்படம்.

(குமுதம் சினிமா தொடரில் பிரசுரமானது)


suresh kannan

Monday, May 25, 2020

Taxi (2015) - 'டாக்ஸி… டாக்ஸி…'




‘இந்தக் கதை மட்டும் கிடைச்சிருச்சுன்னா உடனே பூஜை போட்டுடலாம்ஜி’ என ‘காதலிக்க நேரமில்லை’ செல்லப்பா மாதிரி நிறைய இயக்குநர்கள் அலப்பறை தருவார்கள். ஆனால் நம்மைச் சுற்றியே எத்தனையோ கதைகள் காற்றில் உலவிக் கொண்டிருக்கின்றன. கண்ணையும் காதையும் திறந்து வைத்திருந்தாலே போதும் என்பதை பல உலக சினிமாக்கள் சொல்கின்றன. அந்த வகையில் இரானிய சினிமாக்கள் முன்வைக்கும் உலகத்தின் கதைகள் மிக இயல்பானவை.

ஜாபர் பனாஹி இயக்கியிருக்கும் ‘டாக்ஸி’ திரைப்படம் அந்த வகையில் ஒன்று. சில அந்நியர்களையும் அறிந்தவர்களையும் தன்னுடைய டாக்ஸியில் ஏற்றி பயணம் செய்கிறார் இயக்குநர். அவர்களின் உரையாடல்களும் காட்சிகளும்தான் முழுத் திரைப்படமும். பெரும்பாலான காட்சிகள் காரின் உள்ளே வைக்கப்பட்டிருக்கும் காமிராக்கள் மூலமாகவே காட்டப்படுகின்றன. இந்த உரையாடல்களின்  மூலமாக இரானிய தேசத்தின் அடக்குமுறை கலாச்சாரம், கருத்துரிமை மீதான தடை, மதஅடிப்படைவாதம், கலாச்சார காவலர்களின் அராஜகம், எந்நேரமும் கண்காணிப்பில் இருக்கும் சமூகம் போன்றவை நமக்கு புலப்படுகின்றன.

**

டாக்ஸியில் ஏறும் அவர்கள் இயல்பாக பேசத் துவங்குகிறார்கள். இளைஞன், கார் டயர்களை திருடுபவர்களைப் பற்றி திட்டத் துவங்குகிறான். “இவர்களையெல்லாம் தூக்குல போடணும் சார்.. திருட்டுப்பசங்க.. ஒண்ணு, ரெண்டு பேருக்கு மரண தண்டனை கொடுத்தாதான் மத்தவனுங்களுக்கு பயமிருக்கும்”

பின்னால் அமர்ந்திருக்கும் பெண்மணி இதை பலமாக ஆட்சேபிக்கிறார். “குற்றத்தின் காரணங்களை கண்டுபிடிக்காமல் ரெண்டு பேரை தூக்குல போட்டுட்டா  மட்டும் குற்றங்கள் குறைஞ்சுடுமா? இப்பவும் குற்றங்கள் அப்படியேதானே இருக்கு”.

இதை அவன் ஒப்புக் கொள்வதில்லை. “நீங்க என்ன வேலை செய்யறீங்க? டீச்சரா? அதான் இப்படிப் பேசறீங்க.. இப்படி செய்யாம அவங்க திருந்த மாட்டாங்க” இப்போது அந்தப் பெண்மணி கேட்கிறார். “நீங்க என்ன வேலை பாக்கறீங்க?”

டாக்ஸியிலிருந்து இறங்கிக் கொண்டே அவன் சொல்கிறான் “நானா? பிக்பாக்கெட் அடிக்கற தொழில் செய்யறேன். இருந்தா கூட கார் டயர் திருடற அளவிற்கு கேவலமானவன் இல்ல” என்ற படி சென்று விடுகிறான்.

**

விபத்தில் சிக்கிக் கொள்ளும் ஒருவனை இவரது டாக்ஸியில் ஏற்றுகிறார்கள். அவனது மனைவி ஒப்பாரி வைக்கிறாள். அடிபட்டவன் அவசரம் அவசரமாக ‘தன் உயிலை எழுத வேண்டும்’ என அடம்பிடிக்கிறான். இயக்குநரின் மொபைலில் உள்ள வீடியோ கேமிரா மூலம் அவன் சொல்வது படமாக்கப்படுகிறது. ‘எனக்குப் பிறகு என் வீடு மனைவிக்கு செல்ல வேண்டும்” பிறகு சுயநினைவை இழந்து விடுகிறான்.

மருத்துவமனைக்குள் அவனை கொண்டு செல்கிறார்கள். அவசரம் அவசரமாக திரும்பி வரும் அவனின் மனைவி வீடியோவை கேட்கிறாள். ‘அவனுக்கு ஏதாவது ஆகி விட்டால் இதுதான் எனது சாட்சியம்” என்கிறார். தான் பிறகு அனுப்புவதாக சொல்கிறார் இயக்குநர். என்றாலும் மறுபடியும் தொலைபேசியில் அவரை அழைத்து நினைவூட்டிக் கொண்டே இருக்கிறாள்.

**

திருட்டு டிவிடி விற்கும் ஒருவன் டாக்ஸியில் ஏறுகிறான். இயக்குநரை அடையாளங் கண்டு சிரிக்கிறான். “என்னைத் தெரியலையா சார். நான்தான் உங்க வீட்டிற்கு வந்து டிவிடில்லாம் தருவேன். உங்க மகன் கூட வாங்குவார்”. இயக்குநர் மையமாக புன்னகைக்கிறார். பிறகு அவனது வாடிக்கையாளர் வீட்டிற்கு செல்லச் சொல்கிறான். டிவிடி வாங்க வரும் வாடிக்கையாளன் இயக்குநரைப் பார்த்து ஆச்சரியமடைகிறான்.

தானும் படம் இயக்க விரும்புவதாக சொல்லி அதற்கு ஆலோசனைகள் கேட்கிறான். ‘நீயேதான் அதை தேடிக் கண்டுபிடிக்க வேண்டும்” என்கிறார் இயக்குநர். திருட்டு டிவிடி விற்கிறவன் இயக்குநரை தன்னுடைய கூட்டாளி என்பது போல் வாடிக்கையாளனுக்கு சொல்லியிருக்கிறான் என்பது தெரிகிறது. பிறகு அதை சிரித்தபடி விசாரிக்கிறார் இயக்குநர். “சார்.. நீங்க கூட இருந்ததாலதான் அவன் எல்லா டிவிடியும் வாங்கினான்”

**

இரண்டு வயதான பெண்கள் டாக்ஸியில் ஏறுகிறார்கள். பதட்டமாக இருக்கிறார்கள். என்னவென்று விசாரிக்கிறார் இயக்குநர். அவர்கள் குடுவையில் வைத்திருக்கும் மீனை கோவில் குளத்தில் மதியம் 12 மணிக்குள் போட்டு விட வேண்டும். மீனுக்கு ஏதாவது ஆகி விட்டால் அவர்களுக்கு ஏதாவது தீங்கு நடக்கும் என அச்சப்படுகிறார்கள். “சீக்கிரம் போப்பா’ என அவசரப்படுத்துகிறார்கள். வழியில் மீன் குடுவை உடைகிறது. அதை ஒரு பிளாஸ்டிக் கவரில் மாற்றித் தந்து அவர்களை வேறு காரில் ஏற்றி அனுப்புகிறார் இயக்குநர்.

**

உறவுக்கார சிறுமி இவருக்காக பள்ளியின் வாசலில் காத்திருக்கிறாள். ‘வர்றதுக்கு இவ்ள நேரமா? என்னை யாராவது கடத்திட்டு போயிருந்தா என்ன செய்யறது?” என விளையாட்டுக்கு பொரிந்து தள்ளுகிறாள். டாக்ஸியில் பயணிக்கும் போது அவளுடைய பள்ளியில் தந்திருக்கும் போட்டி ஒன்றைப் பற்றி சொல்கிறாள். ஒரு குறும்படம் எடுக்க வேண்டும். அந்தப் படத்தில் எவையெல்லாம் இருக்கக்கூடாது என்று ஆசிரியர் சொன்னதைப் பட்டியல் போடுகிறாள். மதத்திற்கு எதிரானதாக எதுவும் இருக்கக்கூடாது உள்ளிட்ட பல நிபந்தனைகள். அவளுக்கு எதுவும் புரிவதில்லை.

அடுத்து, மனித உரிமை வழக்குகளை கையாளும் வழக்கறிஞர் பெண்மணி காரில் ஏறுகிறார். ஆண்கள் விளையாடும் ஒரு போட்டியைப் பார்க்கச் சென்ற காரணத்திற்காக பெண்ணொருத்தி சிறையில் இருப்பதைப் பற்றியும்  அங்கு அவள் உண்ணாவிரதம் இருப்பதைப் பற்றியும் உரையாடல் அமைகிறது.

டாக்ஸியில் எவரோ பர்ஸை விட்டுச் சென்றிருப்பதை சிறுமி சொல்கிறாள். மீன் குடுவை வைத்திருந்த முதிய பெண்மணிகளுடையது. அவர்களைத் தேடி கோயிலுக்குச் செல்கிறார் இயக்குநர். அந்த நேரத்தில் இவருடைய டாக்ஸியில் ஒருவன் காமிராக்களை திருடுவதோடு படம் நிறைகிறது.

**

இதில் நடித்திருப்பவர்கள் பெரும்பாலும் தொழில்முறை நடிகர்கள் அல்ல. பல சர்வதேச விருதுகளைப் பெற்ற திரைப்படம் இது.


(குமுதம் சினிமா தொடரில் பிரசுரமானது)


suresh kannan

Sunday, May 24, 2020

My Little Bride (2004) -'சின்னஞ்சிறு மணமகள்'




இந்த தென்கொரிய நகைச்சுவை திரைப்படத்தில் கதை என்று பெரிதாக ஏதுமில்லை.   'குஷி' திரைப்படத்தின் துவக்கத்தில் எஸ்.ஜே.சூர்யா அசரிரீயாக வந்து 'இதுதான் கதை' என்று ஒன்லைன் சொல்லி விட்டுப் போவார் அல்லவா, அது மாதிரியான சிக்கனமான கதை. ஆனால் குஷியைப் போலவே  ட்ரீட்மெண்ட்டில் அட்டகாசப்படுத்தியிருக்கிறார்கள். தென்கொரிய திரைவரலாற்றில் அதிகம் வசூலாகி சாதனை படைத்த திரைப்படங்களில் இதுவுமொன்று.

***

Sang-min இருபதுகளில் இருக்கும் இளைஞன். பார்க்கும் பெண்களையெல்லாம் 'ஜொள்'வது அவனுடைய முக்கியமான பொழுதுபோக்கு. உடம்பு சரியில்லாத தாத்தாவை பார்ப்பதற்காக ஊருக்குத் திரும்பும் அவனுக்கு ஓர் அதிர்ச்சி காத்திருக்கிறது. அவனை உட்காரவைத்து சாவகாசமாக தலையில் குண்டு போடும் தாத்தா சொல்வது இதுதான். "நீ Bo-eun-ஐ திருமணம் செய்து கொள்ள வேண்டும். கொரியப் போர் நடந்த போது இரண்டு குடும்பத்திற்குள்ளும் திருமண சம்பந்தம் நடக்கும் என்று நான் வாக்கு தந்திருக்கிறேன்"


Bo-eun-ம் இதைக் கேட்டு பயங்கர அதிர்ச்சியடைகிறாள்.  "தாத்தா, என்ன விளையாடுகிறீர்களா?  எனக்கு 16 வயதுதான் ஆகிறது. நான் படிக்க வேண்டியிருக்கிறது. அதிலும் போயும் போயும்...இவனைப் போய் திருமணமா?.. போ.. தாத்தா" என்று கோபத்துடன் கிளம்பி விடுகிறாள். இருவரும் சிறுவயதிலிருந்தே ஒன்றாக விளையாடி வளர்ந்தவர்கள் என்பதால் அவர்களிடம் அண்ணன்-தங்கை என்பதான மனோபாவமே படிந்திருக்கிறது. இருவருக்குமே இந்த திருமணத்தில் விருப்பமில்லை.

ஆனால் தாத்தா விடுவதாயில்லை. உயிருக்கு ஆபத்தாக மருத்துவமனையில் இருக்கிறேன் என்று நாடகமெல்லாம் ஆடி திருமணத்தை கட்டாயப்படுத்துகிறார். Bo-eun வேறுவழியின்றி கண்ணீருடன் திருமணத்திற்கு சம்மதிக்கிறாள்.

***


Sang-min-க்கும் இந்த திருமணத்தில் விருப்பமேயில்லைதான் என்றாலும் வேறு வழியில்லாத சூழலில் Bo-eun மீது மெலிதான காதல் கிளம்புகிறது. ஆவலுடன் தேன்நிலவுப் பயணத்திற்கு கிளம்புகிறான். ஆனால் விமானநிலையத்தில் அவனை ஏமாற்றி விட்டு Bo-eun துயரத்துடன் தன் சொந்த ஊரில் சுற்றிக் கொண்டிருக்கிறாள். இரண்டு பேரும் ஊருக்குச் சென்றிருக்கிறார்கள் என்றே எல்லோரும் நினைக்கிறார்கள்.

Bo-eun எங்கெங்கோ சுற்றி விட்டு நடுஇரவில் வீட்டின் முன் நின்று கொண்டிருக்கிறாள். உலக வரலாற்றிலேயே தனியாக ஹனிமூன் கொண்டாடிய Sang-min சரியாக அந்த நேரத்தில் வீடு திரும்புகிறான். சட்டென்று அவளுடைய உடையை மாற்றி விட்டு உள்ளே நுழைகிறார்கள்.  இரண்டு பேர்களின் பெற்றோர்களும் அவர்களை மகிழ்ச்சியுடன் வரவேற்கிறார்கள்.

தனிக்குடித்தனம் துவங்குகிறது.  வெளிப்பார்வைக்கு அவர்கள் தம்பதியர்களாக இருந்தாலும் வீட்டினுள் எலியும் பூனையுமாக இருக்கிறார்கள். தனக்கு திருமணம் ஆன செய்தி தெரிந்தால் பள்ளியில் கிண்டலடித்து தீர்த்து விடுவார்களே என்று தன் திருமண விவரத்தை எவருக்கும் தெரியாமல் ரகசியம் காக்கிறாள் Bo-eun.


***

ஃபேஸ்பால் விளையாட்டு வீரனாக இருக்கும் சக மாணவன் ஒருவன் மீது நேசம் கொள்கிறாள் Bo-eun.  உண்மையில் அவளுக்கு தனக்கு நடந்த திருமணம் என்பது ஒரு விளையாட்டு போலவே தோன்றுகிறது. Sang-min தன் கணவன் என்றே அவளுக்குத் தோன்றுவதில்லை. எனவே தன் வயதிற்கு இணையான மாணவன் அருகில் வருவதே அவளுக்கு மகிழ்ச்சியானதாக இருக்கிறது. ஃபேஸ்பாலுக்காக ஏங்கும் மாணவிகள் Bo-eun-ஐ பொறாமையுடன் பார்க்கிறாள். "ஏய் உனக்கென்னடி.. ஹஸ்பண்டும் இருக்காரு.. பாய் பிரண்டும் இருக்காரு. எனக்கு யாருமே இல்லை" என்று நொந்து போகிறாள் இவளுடைய தோழி.


Bo-eun-ன்  அன்பைப் பெறுவதற்காக என்னென்னவோ முயற்சிகளில் ஈடுபடுகிறான் Sang-min. எல்லாமே தோல்வியில் முடிகிறது. இதற்கிடையில் பயிற்சியொன்றிற்காக  Bo-eun பள்ளிக்கே ஆசியரராக வருகிறான் Sang-min. அவளுக்கு ஆச்சரியமாகவும் அதிர்ச்சியாகவும் இருக்கிறது.


Sang-min திருமணம் ஆகாதவன் என நினைத்துக் கொண்டு அங்குள்ள வயதான ஆசிரியை ஒருத்தி இவனை காதலுடன் துரத்துகிறாள். இது சார்ந்த குறும்பான நிகழ்ச்சிகள் நடக்கின்றன.


ஒரே வீட்டில் எலியும் பூனையுமாக இருந்தாலும் Sang-min-ன் நல்ல குணங்களையும் அன்பையும் மெல்ல மெல்ல புரிந்து கொள்ள ஆரம்பிக்கிறாள் Bo-eun.

***


வயதான ஆசிரியைக்கு உண்மை தெரிந்து போய் Bo-eu-ஐ மறைமுகமாக தண்டிப்பதற்காக, பள்ளி ஆண்டுவிழா ஏற்பாட்டை முன்னிட்டு ஒரு பெரிய சுவரை அழகுபடுத்தச் சொல்கிறாள்.  ஆனால் Bo-eun அதை தனியாளாகச் செய்து முடிக்க வேண்டும். இரவெல்லாம் உழைக்கிறாள் Bo-eun. அவளுடைய தோழியும் உதவுகிறாள். என்றாலும் அவர்கள் நினைத்தது போல் அழகாகவில்லை.


இந்த விஷயத்தை அறியும் Sang-min தன் நண்பர்களுடன் சென்று சுவரின் ஓவியத்தை ஒழுங்குபடுத்துகிறான். சிறுவயதில் தானும் Bo-eun-ம் விளையாடிய ஊஞ்சல் விளையாட்டை அழகான ஓவியமாக  வரைந்து வைக்கிறான். இதைப் பார்க்கும் Bo-eun நெகிழ்ந்து கண்ணீர் விடுகிறாள்.

ஆண்டு விழா கொண்டாட்ட நாளன்று Sang-min-ஐ உரையாடச் சொல்கிறார்கள். அப்போது குறுக்கிடும் மாணவி ஒருத்தி இவர்களின் திருமண விஷயத்தை பொது மேடையில் போட்டு உடைத்து வீடுகிறாள்.

"Bo-eun மீது எந்த தவறுமில்லை. பெரியவர்களின் கட்டாயத்தினால் அவள் என்னை திருமணம் செய்து கொண்டாள். அவளுக்குப் பிடித்தமானவர்கள் இந்தப் பள்ளியிலேயே கூட இருக்கலாம். தயவுசெய்து அவளைக் கிண்டல் செய்து அவள் படிப்பை பாழடிக்காதீர்கள்" என்று உருக்கமாக வேண்டுகிறான்.

இதைப் பார்த்து கண்ணீர் விடும் Bo-eun ஓடி வந்து அவனை அணைத்துக் கொள்ள ஒட்டுமொத்த பள்ளியே கைதட்டி மகிழ்கிறது.

***


Bo-eun -ஆக Moon Geun-young அற்புதமாக நடித்திருக்கிறார். இவருடைய குறும்பான முகபாவங்கள், உடல்மொழி அனைத்தும் நம்ம ஊர் 'ஜோதிகா'வை நினைவுப்படுத்துகிறது. Sang-min- ஆக நடித்திருக்கும் Kim Rae-won-ன் நடிப்பும் பிரமாதம். ஏற்கெனவே சொன்னபடி இதன் ரகளையான திரைக்கதைதான் இத்திரைப்படத்தின் பெரிய பலம். My Wife Is 18 என்கிற ஹாங்காங் படத்தின் ரீமேக் இது. இயக்கம் -  Kim Ho-jun.


(குமுதம் சினிமா தொடரில் பிரசுரமானது)


suresh kannan

Saturday, May 23, 2020

Instructions Not Included (2013) - 'மெக்ஸிகோவின் 'தெய்வத் திருமகள்'



தாயின் அன்பும் பாசமுமே பொதுவாக அதிகம் பேசப்பட்டுக் கொண்டிருக்கும் சினிமாவில் ஒரு தந்தைக்கும் மகளிற்கும் இடையே உள்ள அன்பை ஜாலியாகவும் நெகிழ்வாகவும் சொல்லும் மெக்ஸிகோ நாட்டின்  நகைச்சுவை திரைப்படம் இது.

**

அச்சம் என்றால் என்னவென்றே அறியக்கூடாது என்பதற்காக மலையுச்சியில் இருந்து தள்ளி விடுவது உள்ளிட்ட பல்வேறு பயிற்சிகளை சிறுவனான வாலன்டைனுக்கு தருகிறார் அவனது தந்தை. என்றாலும் கூட அவனுக்கு உள்ளூற பல விஷயங்களில் அச்சம் இருக்கிறது.

பெயருக்கு ஏற்றாற் போல பலவிதமான பெண்களுடன் உறவிருக்கும் காதல் மன்னனாக இருக்கிறான் இளைஞன் வாலன்டைன். ஒரு நாள், அவனது அறையைத் தட்டும் ஓர் இளம்பெண், ‘உன் குழந்தையை பிடி. ‘இதோ வருகிறேன்’ என்று சென்று விடுகிறாள். பிறகு அவள் திரும்பி வருவதில்லை.

தன்னுடைய சுதந்திரத்திற்கு தடையாய் இருக்கும் அந்தப் பெண் குழந்தையை வைத்துக் கொண்டு என்ன செய்வது என்று அவனுக்குத் தெரிவதில்லை. தாயைத் தேடி அவளிடம் ஒப்படைத்து விடுவோம் என்று மெக்ஸிகோவில் இருந்து லாஸ் ஏஞ்செல்ஸ் நகருக்கு சட்டவிரோதமாக வருகிறான்.

**

குழந்தையின் தாயை அங்கு கண்டுபிடிக்க முடிவதில்லை.  நீச்சல் குளத்தின் அருகே சென்று விடும் குழந்தையைக் காப்பாற்றுவதற்காக உயரமான கட்டிடடத்தின் மேலேயிருந்து குதிக்க வேண்டிய ஒரு சூழல். தன்னுடைய தந்தை தந்த பயிற்சியை மனதில் நினைத்துக் கொண்டு எப்படியோ கீழே குதித்து குழந்தை மேகியைக் காப்பாற்றுகிறான். தனது திரைப்படங்களுக்காக ஆபத்தான சாகசக் காட்சிகளை செய்யும் ஒரு ‘ஸ்ட்ண்ட் மேனை’ தேடிக் கொண்டிருக்கும் இயக்குநர் கண்ணில் படுகிறான். உள்ளுக்குள் பயப்படுகிறவனாக இருந்தாலும் வேறு வழியில்லாமல், குழந்தையை வளர்ப்பதற்காக அந்தப் பணியில் சேர்கிறான்.

குழந்தை மேகியுடன் அவனுக்கு ஒட்டுதல் ஏற்படுகிறது. அவளுக்காக வீட்டையே ஒரு தீம் பார்க் போல மாற்றி அதிக அன்பைச் செலுத்துகிறான். அவள் தன் தாயின் பிரிவை உணரக்கூடாது என்பதற்காக, அவளுடைய தாய் ஜூலி அனுப்புவது போல பல போலியான கடிதங்களை அனுப்பி நம்பச் செய்கிறான்.

**
தாயை நேரில் காண வேண்டும் என்று மேகி அடம்பிடிக்க அவளுக்காக ஒரு நடிகையை ஏற்பாடு செய்ய அவன் முயற்சிக்கும் போது மேகியின் உண்மையான தாயான ஜூலியே அவனைத் தேடி வருகிறாள். மேகிக்கு தன் தாயைக் கண்டு மிக்க மகிழ்ச்சி. அவள் இதுவரை பல்வேறு ஊர்களுக்கு சென்றிருந்ததாக வாலன்டைன் சொல்லியிருக்கும் பொய்களை இவளும் இணைந்து ஒரு மாதிரியாக சமாளிக்கிறாள்.

தாயும் மகளும் பரஸ்பரம் பயங்கர அன்பைப் பொழிந்து கொள்கிறார்கள். இதற்கிடையில் ஜூலியிடம் ஓர் உண்மையைச் சொல்ல முயல்கிறான் வாலன்டைன். அவனுடைய உயிருக்கு ஆபத்தான நோய் இருப்பது போல காட்சிகள் அமைகின்றன.

மேகியைப் பிரிய முடியாமல் ஊருக்குச் செல்லும் ஜூலியிடமிருந்து வாலன்டைனுக்கு ஒரு நோட்டீஸ் வருகிறது. பிரி்த்துப் பார்த்தால் அதிர்ச்சி. மேகியை அவள் அழைத்துச் சென்று வளர்க்கவிருப்பதாக அந்த நோட்டீஸ் சொல்கிறது. “ஏன் இந்தக் கொடுமையைச் செய்கிறாய்?” என்று மன்றாடுகிறான் வாலன்டைன். ஜூலி கேட்பதாயில்லை.

வழக்கு விசாரணைக்கு வருகிறது. வாலன்டைன் ஒரு ‘ஸ்டண்ட்மேனாக’ ஆபத்தான பணியில் இருப்பதால்  நீதிமன்றத்தில் அதனை காரணம் காட்டுகிறாள் ஜூலி. தன் மகளை விட்டுப் பிரியக்கூடாது என்பதற்காக ஆபத்து அல்லாத சாதாரண பணிகளைச் செய்யவும் தயாராக இருக்கிறான் வாலன்டைன்.

**
வழக்கு ஜூலிக்கு சாதகமாக அமைவது போல சென்றாலும் தன் மகளை வளர்ப்பதற்காக தன் உயிரையும் பணயம் வைக்கத் துணிந்த தந்தையின் அன்பை கருத்தில் கொண்டு மேகி அவனிடமே வளரட்டும் என்று தீர்ப்பளிக்கிறார் நீதிபதி. வாலன்டைன் ஆனந்தக் கண்ணீரில் மூழ்குகிறான்.

இந்த தீர்ப்பினால் அதிர்ச்சியடையும் ஜூலி, மரபணு சோதனைக்காக விண்ணப்பிக்க, முடிவு வாலன்டைனுக்கு பாதகமாக வருகிறது. ஆம். அவன் மேகியின் தந்தையல்ல.

நீதிமன்றத்தின் உத்தரவுபடி ஜூலி, மேகியை அழைத்துச் செல்ல வர, அவளுடன் செல்வதற்கு விருப்பமிருந்தாலும் தந்தையைப் பிரியவே முடியாத மனநிலையில் இருக்கிறாள் மேகி. எனவே இருவரும் கட்டிடத்தின் உச்சியில் இருந்து இறங்கி தப்பி மெக்ஸிகோவிற்கு சென்று விடுகிறார்கள்.

**

தந்தையும் மகளும் மெக்ஸிகோவில் சந்தோஷமாக இருக்கிறார்கள். அவளைத் தேடிக் கொண்டு அங்கும் வருகிறாள் ஜூலி. வாலன்டைனால் அதுவரை மறைத்து வைக்கப்பட்டிருந்த உண்மையை அவள் அறிந்து கொண்டிருக்கிறாள்.

உயிருக்கு ஆபத்தான நோய் இருப்பது வாலன்டைனுக்கு அல்ல. மேகிக்கு. சிறுமியின் பரிதாப மரணத்தோடு படம் நிறைகிறது. எல்லாவித அச்சத்தையும் கடந்து விடும் பயிற்சியுடன் தன் தந்தை வளர்த்ததை அதன்பிறகு நினைவுகூர்கிறான் வாலன்டைன்.

**

உள்ளுக்குள் அச்சம் இருக்கும் வாலன்டைன் படப்பிடிப்புகளில் நிகழ்த்தும் சாகசக் காட்சிகள் நகைச்சுவையாக இருக்கின்றன. அவனுக்கும் மேகிக்குமான அன்பு பல காட்சிகளில் அற்புதமாக பதிவாகியிருக்கிறது.

மேகியாக நடித்திருக்கும் சிறுமியின் நடிப்பு அபாரம். வாலன்டைனாக Eugenio Derbez சிறப்பாக நடித்திருக்கிறார். படத்தை இயக்கியவரும் இவரே. மெக்ஸிகோவில் அதிகம் வசூலான திரைப்படங்களில் ஒன்றாக இது அமைந்தது.

(குமுதம் சினிமா தொடரில் பிரசுரமானது)


suresh kannan

Friday, May 22, 2020

Nightcrawler (2014) - 'செய்திக் கொடூரன்'





செய்திகளை பரபரப்பாக்கி முந்தித் தரும் வணிகப் போட்டிக்காக ஊடகங்கள் அறவுணர்வை இழந்து எவ்வகையான கீழ்மைகளுக்கெல்லாம் செல்லுகின்றன என்பதையும் மனிதத்தன்மையை இழக்கும் இந்த கலாச்சாரம் வளரும் பயங்கரத்தையும் முகத்தில் அறையும் கடுமையுடன் சொல்கிறது இந்த திரைப்படம்.

**

லூ ப்ளூம் ஒரு சில்லறைத் திருடன். தடுப்புக் கம்பிகள், சாக்கடை மூடிகள் போன்றவற்றை திருடி விற்று சம்பாதிப்பவன். திருடன் என்பதால் எவரும் வேலை தருவதில்லை. ஆனால் நிலையானதொரு தொழிலில் ஈடுபட்டு வாழ்க்கையில் முன்னேற வேண்டுமென்கிற வெறி அவனுக்குண்டு.

அந்தச் சிந்தனையில் அவன் காரில் சென்று கொண்டிருக்கும் போது ஒரு  சாலை விபத்தையும், அதை ஒருவன் அவசரம் அவசரமாக  காமிராவில் படம்பிடிப்பதையும்  பார்க்கிறான். . என்னவென்று விசாரிக்கிறான். இம்மாதிரியான விபத்துக் காட்சிகளை, ரத்தம் வழியும் பயங்கரமான தருணங்களை படமாக்கி, அந்தக் காட்சித் துண்டுகளை செய்தி சானல்களிடம் விற்று பணமாக்க முடியும் என்று தெரிய வருகிறது.

விலையுயர்ந்த சைக்கிள் ஒன்றை திருடி விற்று தன் தொழிலைத் துவங்குகிறான். காவல்துறையினரின் உரையாடல்களை கேட்கக்கூடிய கருவி மற்றும் ஒரு காமிராவை வாங்குகிறான். முதலில் சில தோல்விகளைச் சந்தித்தாலும் இதிலுள்ள போட்டிகளையும் விதிகளையும் பிறகு மெல்ல மெல்ல அறிகிறான்.

விபத்து, குற்றம், வன்முறை நிகழும் இடத்திற்கு எவர் முதலில் விரைவாகச் சென்று அந்தக் காட்சிகளை திறமையாக பதிவு செய்கிறார்களோ அவர்களே இதில் சம்பாதிக்க முடியும். சற்று தாமதம் ஆனாலும் போச்சு. போட்டியில் எவனாவது முந்திக் கொள்வான்.

லூ இந்த வித்தையில் மெல்ல முன்னேறுகிறான். முதல் போணி. விபத்து தொடர்பான ரத்தம் ஒழுகும் ஒரு வீடியோ துண்டை எடுத்துக் கொண்டு  செய்தி சானலுக்கு செல்கிறான். நிகழ்ச்சி அதிகாரி அதை எடுத்துக் கொண்டு பேரத்திற்குப் பிறகு சொற்ப தொகையை தருகிறாள். ‘உன்னிடம் திறமை இருக்கிறது. நல்லதாக ஒரு கேமரா வாங்கிக் கொள்’.

**

வேலை தேடி அலையும் ஓர் இளைஞனை தன்னுடைய உதவியாளனாக அமர்த்திக் கொள்கிறான் லூ. அவனிடம் சாமர்த்தியமாக பேசி குறைந்த தொகைக்கு ஒப்புக் கொள்ளச் செய்கிறான்.

குற்றச் செய்திகளை அதிவேகமாக துரத்தும் இதன் வசீகரம் அவனுக்கு பிடித்துப் போகிறது. மூர்க்கமாக முன்னேறுகிறான். இதே தொழிலில் இருக்கும் ஒரு போட்டியாளன் விபத்தில் சிக்கும் போது அவனையும் வீடியோ எடுக்க லூ தயங்குவதில்லை. அந்த அளவிற்கு மனிதத்தன்மையை இழப்பவனாக மாறுகிறான். இதற்காக சட்டமீறல்களையும் சாமர்த்தியமாக செய்கிறான்.

லூ விற்கும் அவனுடைய உதவியாளனுக்கும் சம்பளம் தொடர்பாக அவ்வப்போது விவாதங்கள் நிகழ்கின்றன. அவனுக்கு ஆசை காட்டி ஒரு மாதிரியாக சமாளிக்கிறான். ‘என்னுடைய வேகத்திற்கு நீ ஈடு தந்தால் அதற்கேற்ப பணம் கிடைக்கும். வேலையை கற்றுக் கொள்”

**

ஒரு வீட்டில் துப்பாக்கிச் சப்தம் கேட்பதாக ஸ்கேனர் கருவியில் தகவல் கிடைக்கிறது. தனது காரை அதிவிரைவாக எடுத்துச் சென்று மின்னல் வேகத்தில் அந்த இடத்தை அடைகிறான். கொலையாளிகள் அப்போதுதான் வெளியேறுகிறார்கள்.

மூச்சைப் பிடித்துக் கொண்டு அந்தக் காட்சிகளை பதிவு செய்கிறான். பிறகு கொலை நடந்த வீட்டிற்குள் நுழைந்து ரத்தம் வழிய கிடக்கும் சடலங்களை வீடியோ எடுக்கிறான். இதற்குப் பிறகுதான் போலீஸே வருகிறது. அவசரம் அவசரமாக வெளியேறி விடுகிறான்.

செய்தி சானலுக்குப் போகும் வழியில் சாமர்த்தியமாக ஒரு காரியத்தைச் செய்கிறான். கொலைகாரர்களின் முகம் பதிந்திருக்கும் காட்சிகளை துண்டித்து தனியாக எடுத்துக் கொண்டு மீதமுள்ளவற்றை செய்தி சானலுக்கு அதிக விலைக்கு விற்கிறான். இதன் பிரத்யேகமான காட்சிகள் வேறு எந்த தொலைக்காட்சியிடமும் இல்லை என்பதால் இவனுடைய மதிப்பு உயர்கிறது.

**

வீடியோவில் தெரியும் கொலைகாரர்களின் வாகன எண்ணின் மூலம் அவர்களது முகவரியை அறிந்து வெளியே காத்திருக்கிறான். அவர்கள் கிளம்பும் போது பின்தொடர்கிறான். அவர்கள் ஒரு உணவகத்தில் இருக்கும் போது காவல்துறையினருக்கு அவர்களைப் பற்றிய தகவலைத் தருகிறான்.

போலீஸ் அங்கே வரும் போது அவர்களுக்கும் கொலையாளிகளுக்கும் மோதல் நிகழும். அதை வீடியோ எடுத்து ‘Exclusive News’ ஆக விற்பனை செய்வது அவனது நோக்கம். “இது சட்டவிரோதம்” என்று உதவியாளன் தடுக்க முயல்கிறான். லூ கேட்பதாயில்லை. ‘தான் இதற்கு ஒத்துழைக்க முடியாது” என்று உதவியாளன் பின்வாங்க முயல, அவனை மிரட்டியும் ஆசை காட்டியும் பணிய வைக்கிறான் லூ.

இவன் எதிர்பார்த்தபடியே போலிஸூக்கும் கொலைகாரர்களுக்கும் துப்பாக்கிச் சண்டை நடக்கிறது. கொலையாளிகள் தப்பிச் செல்ல அவர்களை காரில் வேகமாக பின்தொடர்கிறான். போலீஸூம் அவர்களைத் துரத்துகிறது. ஒரு கட்டத்தில் கொலைகாரர்களின் வாகனம் தடுமாறி விழுகிறது.

அருகில் சென்று பார்க்கும் லூ, தனது உதவியாளனை நெருங்கி வந்து வீடியோ எடுக்கச் சொல்கிறான். உள்ளே இருக்கும் கொலைகாரன் ஆத்திரத்துடன் உதவியாளனை துப்பாக்கியால் சுட பரிதாபமாக அவன் செத்துப் போகிறான். கருணையேயின்றி அவனுடைய சடலத்தையும் வீடியோ எடுக்கிறான் லூ..

**

இந்தச் சம்பவம் தொடர்பாக போலீஸ் இவனிடம் விசாரணை செய்கிறது. எல்லாவற்றிற்கும் சாமர்த்தியமாக பதில் சொல்லி தப்பிக்கிறான்.

மனித உயிர்களைப் பற்றியோ உணர்வுகளைப் பற்றியோ எந்தக் கவலையுமில்லாமல் பணத்திற்காக பரபரப்பு செய்திகளை நோக்கி ஓடும் இவனும் ஒரு விபத்தில் இறந்து விடுவான் என்கிற நீதிக்கதையின் முடிவை நீங்கள் எதிர்பார்த்தால் ஏமாந்து போவீர்கள். யதார்த்தம் அப்படியல்ல. அவன் சில பல உதவியாளர்களோடு ஒரு செய்தி நிறுவனத்தை உருவாக்குவதோடு படம் நிறைகிறது.

**

லூ ப்ளூம் ஆக Jake Gyllenhaal அற்புதமாக நடித்திருக்கிறார். Dan Gilroy இயக்கிய இந்த திரைப்படம் ‘சிறந்த திரைக்கதைக்காக’ ஆஸ்கர் நாமினேஷனில் இடம்பெற்றது.

(குமுதம் சினிமா தொடரில் பிரசுரமானது)

suresh kannan

Thursday, May 21, 2020

The Fencer (2015) - 'வாள் முனையில் நிற்கும் அன்பு'





மாணவர்களுக்காக தன் உயிரையே பணயம் வைக்கத் துணியும் ஓர் ஆசிரியரைப் பற்றிய உணர்வுபூர்வமான, பின்லாந்து திரைப்படம் இது. உண்மைச் சம்பவங்களின் அடிப்படையில் உருவாக்கப்பட்டது.

**

ரஷ்ய நகரான லெனின்கிராடிலிருந்து எஸ்தோனியாவிலுள்ள ஒரு சிறிய நகரத்திற்கு தனது பெயர் அடையாளத்தை மாற்றிக் கொண்டு செல்கிறான் Endel Nelis, அதற்குப் பின் துயரமான வரலாற்றுக் காரணம் இருக்கிறது.

இரண்டாம் உலகப் போர் நிகழ்ந்து கொண்டிருந்த சமயம். எஸ்தோனியா, ஜெர்மனியின் ஆக்ரமிப்பில் இருந்த போது நாஜி படையால் அங்கிருந்த இளைஞர்கள் கட்டாயமாக ராணுவத்தில் சேர்க்கப்பட்டார்கள். அதன் பிறகு எஸ்தோனியாவை ரஷ்யா கைப்பற்றிய பிறகு ஜெர்மானிய ராணுவத்தில் இணைந்தவர்களையெல்லாம் தேடிக் கண்டுபிடித்து கைது செய்து சைபீரிய சிறைக்கு அனுப்பினார்கள். அவர்களின் கதி என்னவானது என்பது அதன் பிறகு எவருக்கும் தெரியாது. கட்டாயமாக ராணுவத்தில் இணைக்கப்பட்ட அப்பாவிகள் பழிவாங்கப்பட்டது வரலாற்றுக் கொடுமை.

**

Endel Nelis அவ்வாறான ஒரு ராணுவ வீரன். எனவே ரகசிய போலீஸ் கண்களில் படாமல் மறைந்து வாழ்வதற்காக இந்த ஊருக்கு வந்திருக்கிறான். அங்குள்ள பள்ளியில் உடற்பயிற்சி ஆசிரியராக பணிக்குச் சேருகிறான். அங்கு போதிய அளவில் விளையாட்டு உபகரணங்கள் இருப்பதில்லை. சிடுமூஞ்சி தலைமையாசிரியர் ‘இருப்பதை வைத்து ஏதாவது செய்’ என்று கூறி விடுகிறார்.

வாள் சண்டையில் திறமையுள்ள Endel Nelis தனிமையில் பயிற்சி செய்து கொண்டிருப்பதை ஓர் இளம் மாணவி பார்த்து விட்டு, ‘எங்களுக்கும் கற்றுத் தருவீர்களா?” என்று கேட்கிறாள். முதலில் மறுக்கும் அவன் பிறகு ஒப்புக் கொள்கிறான். அங்குள்ள பெரும்பாலான மாணவர்கள் இதைக் கற்க ஆர்வமாக முன்வருகிறார்கள்.

மெல்ல மெல்ல அவர்களுக்கு விளையாட்டு நுணுக்கங்களை பயிற்சியளிக்கிறான். அங்கு பணிபுரியும் ஓர் இளம் ஆசிரியை இந்த விஷயத்தைப் பாராட்டுகிறாள். ஆனால் தலைமையாசிரியருக்கு இது பிடிப்பதில்லை. பெற்றோர்களின் மூலமாக தடை செய்ய நினைக்கிறார். அதற்கான கூட்டத்தில் சில தயக்கங்களுக்குப் பின் பெற்றோர்களின் ஆதரவு கூடவே அவரால் எதுவும் செய்ய முடிவதில்லை.

**

இவனுடைய பின்னணி பற்றி சந்தேகம் வரும் தலைமையாசிரியர், தன்னுடைய உதவியாளரை நகரத்திற்கு அனுப்பி விசாரிக்கச் சொல்கிறார். இதற்கிடையில் அந்த ஊருக்கு Endel Nelis-ன் நண்பன் வருகிறான். “நீ முதலில் இங்கிருந்து கிளம்பு. ரகசிய போலீஸ் உன்னை தீவிரமாக தேடுகிறது. இனியும் ஒரே இடத்தில் தங்கினால் ஆபத்து” என்று எச்சரிக்கிறான்.

அவனுடன் கிளம்பி விடும் Endel Nelis ரயில் நிலையத்தில் தயங்கி, மாணவர்களைப் பற்றி யோசித்துப் பார்க்கிறான். மிக ஆர்வத்துடன் வாள் சண்டை கற்றுக் கொள்ளும் அவர்களின் முகங்கள் அவனுக்குள் மாற்றத்தை ஏற்படுத்துகின்றன. ‘ஆனது ஆகட்டும்’ என்று செல்லாமல் திரும்பி விடுகிறான்.

**

ஒரு நாள் மாணவர்கள் பத்திரிகை விளம்பரத்தைக் கொண்டு வருகிறார்கள். தலைநகர் லெனின்கிராடில் ‘வாள் சண்டை போட்டி’ நடப்பது குறித்தான விளம்பரம். மாணவர்கள் ஆர்வமாக ‘போகலாம்’ என்கிறார்கள். Endel Nelis தயங்குகிறான். நகரத்திற்கு சென்றால் மாட்டிக் கொள்வான். எனவே ‘நீங்கள் இன்னமும் போதிய பயிற்சி பெறவில்லை. அங்கு போட்டி கடுமையாக இருக்கும். எனவே அடுத்த வருடம் பார்க்கலாம்’ என்கிறான். மாணவர்கள் கடுமையான ஏமாற்றத்திற்கு உள்ளாகிறார்கள்.

அவர்களின் ஏமாற்ற முகங்களை சகித்துக் கொள்ள முடியாத Endel Nelis, தனக்கு என்ன வேண்டுமானாலும் ஆகட்டும் என்று நினைத்து ‘போகலாம்’ என்கிறான்.. மாணவர்கள் துள்ளிக் குதித்து மகிழ்ச்சியை வெளிப்படுத்துகிறார்கள். சிறந்த நான்கு மாணவர்களை தேர்வு செய்து நகரத்திற்கு அழைத்துச் செல்கிறான்.

**

போட்டி நடக்குமிடத்திற்கு சென்ற பிறகுதான் ‘நவீன தடுப்பு உடை’ கட்டாயம் என்று தெரியவருகிறது. இவர்களிடம் அது இல்லை. அங்கிருக்கும் இதர குழுக்களிடம் கேட்டுப் பார்க்கிறான். எவரும் தருவதாய் இல்லை. இவனின் வேண்டுகோளைப் பார்த்து விட்டு ஒரு குழுவின் கோச், தாமாக முன்வந்து அந்த உடைகளை தருகிறாள்.

போட்டி ஆரம்பமாகிறது. பார்வையாளர்களின் கூட்டத்தில் ராணுவ வீரர்களும் நின்றிருக்கிறார்கள். Endel Nelis-க்கு சந்தேகம் வருகிறது.  தலைமையாசிரியர் இவனைக் காட்டிக் கொடுத்து விடுகிறார். எனவே அவனை கைது செய்து அழைத்துச் செல்ல போலீஸ் காத்துக் கொண்டிருக்கிறது. இவனுடைய மாணவர்கள் புதிய சூழலில் முதலில் தடுமாறினாலும் இவன் தரும் ஊக்கத்தினால் மெல்ல மெல்ல வெற்றியை நோக்கி நகர்கிறார்கள்.

போட்டியின் இடையில் அங்கிருந்து தப்பிச் சென்று விடலாமா என்று Endel Nelis யோசிக்கிறான். அதற்காக முயன்று மறுபடியும் மாணவர்களை நினைத்து தன் எண்ணத்தை மாற்றிக் கொள்கிறான். வெற்றிப் புள்ளிகளை நோக்கி நகரும் மாணவர்கள், இவனைக் காணாமல் தடுமாறுகிறார்கள். திரும்பி வரும் இவனை, ஒரு சிறுமி ‘இங்கிருந்து நகரக் கூடாது’ என்று வாக்கு தரச் சொல்கிறாள்.

**

இவனுடைய குழு இறுதிப் போட்டிக்கு தகுதி பெறுகிறது. பரபரப்பாக நிகழும் போட்டியில் பெற்றி பெறுகிறது. மாணவர்கள் வெற்றி மகிழ்ச்சியில் இருக்கும் போது, அவர்களின் ஆசிரியரை ராணுவம் கைது செய்து கொண்டு போவதை திகைப்புடன் பார்க்கிறார்கள்.

1953-ல் ரஷ்ய அதிபர் ஸ்டாலின் மறைவதையொட்டி நிறைய சிறைக் கைதிகள் விடுவிக்கப்படுகிறார்கள். Endel Nelis விடுதலையாகிறான். மறுபடியும் அந்த ஊருக்கு திரும்பி வருகிறான். தன் காதலியுடன் அவன் இணைந்து செல்வதை மாணவர்கள் மகிழ்ச்சியும் பரவசமுமாக பார்க்கிறார்கள். Endel Nelis துவக்கிய வாள் சண்டை பயிற்சி நிலையம் இன்னமும் இயங்கும் தகவலுடன் படம் நிறைகிறது.

அற்புதமான ஒளிப்பதிவும் பின்னணி இசையும் கொண்ட திரைப்படம்.  Klaus Härö இயக்கியிருக்கிறார். சிறுமியின் அபாரமான நடிப்பிற்காகவே இந்தப் படத்தை நிச்சயம் பார்க்க வேண்டும்.

(குமுதம் சினிமா தொடரில் பிரசுரமானது)

suresh kannan